PhD nomzodlari va demokratiya faollari uchun Amerikada tadqiqot qilish imkonini beruvchi toʻliq moliyalashtirilgan grant dasturi
-
25/08/2023 Qabul boshlanishi
-
Toʻliq Moliyalash turi
-
AQSh Davlat
-
31.10.2023 Oxirgi muddat
Umumiy maʻlumotlar
The Reagen-Fascell Democracy Fellowship dasturi AQSh sobiq prezidenti Ronald Reygan va kongressmen Dante Fassel sharafiga nomlangan boʻlib, fan nomzodlari, demokratiya faollari, huquqshunoslar, jurnalistlar va fuqarolik jamiyati rahbarlari uchun moʻljallangan xalqaro almashinuv dasturidir.
Dasturda qatnashish orqali dunyoning turli burchaklaridan kelgan olimlar, demokratiya faollari, jurnalistlar demokratiya boʻyicha mustaqil tadqiqot olib borish uchun Vashingtondagi Milliy Demokratiya Jamgʻarmasida (NED) besh oy yashash va amaliyot qilish imkoniyatiga ega boʻladilar.
Dastur davomida qatnashchilar yashash xarajatlari uchun oylik stipendiya beriladi. Shuningdek, Vashingtonga borish va kelish, turarjoy xarajatlari qoplab beriladi.
Dasturda ikki yoʻnalishdan birini tanlab qatnashish mumkin:
- Amaliyotchi yoʻnalishi (practitioner track)
- Ilmiy yoʻnalish (scholarly track)
Dastur quyidagi mavzularga oid seminarlar, davra suhbatlari, sayohatlar va boshqa tadbirlarni oʻz ichiga oladi:
- Jamgʻarma va uning asosiy institutlari faoliyati toʻgʻrisida bilimlarni shakllantirish;
- Sayohatlar va seminarlar orqali demokratiyaga oid taʼlimni taʼminlash;
- Shahar atrofidagi va undan tashqarida hukumat, nodavlat, akademik va ommaviy axborot vositalari bilan muloqot va oʻzaro hamkorlikni qoʻllab-quvvatlash;
- Guruh sifatida hamkasblar oʻrtasida kollegiallik tuygʻusini rivojlantirish.
Bundan tashqari, ishtirokchilar dastur taklif qiladigan koʻplab norasmiy ijtimoiy va madaniy tadbirlarga, jumladan, sport tadbirlariga, muzeylarga, filmlarga borish imkoniga ega boʻladilar.
Dastur tili — ingliz tili.
Dastur uchun ariza topshirishning soʻnggi muddati — 2023-yil, 31-oktabr.
Dastur haqida batafsil maʼlumotni ushbu havola orqali oʻqish mumkin.
Maqbullik shartlari
- Dasturda barcha davlat fuqarolari qatnashishi mumkin;
- Dasturning amaliyotchi yoʻnalishi (practitioner track) ishtirokchilari oʻz mamlakatida demokratiya yoki inson huquqlarini targʻib qilish boʻyicha katta amaliy tajribaga ega boʻlishi kerak. Ushbu yoʻnalishda inson huquqlari himoyachilari, fuqarolik jamiyati yetakchilari, siyosiy partiyalar arboblari, huquqshunoslar, parlament aʼzolari, kasaba uyushmalari faollari, jurnalistlar va boshqa ommaviy axborot vositalari vakillari ishtirok etishi mumkin;
- Ilmiy yoʻnalish (scholarly track) ishtirokchilari ariza topshirish vaqtida doktorlik darajasiga (Ph.D. yoki akademik ekvivalentiga) ega boʻlishlari kerak. Ushbu yoʻnalishda kollej va universitet professorlari, tadqiqot markazlari va tahlil markazlari tahlilchilari, yozuvchilar va jamoat ziyolilari qatnashishi mumkin.
- Ingliz tilini yetarli darajada bilish kerak. Til sertifikati talab qilinmaydi;
- Demokratik rivojlanishning siyosiy, ijtimoiy, iqtisodiy, huquqiy yoki madaniy jihatlariga qaratilgan loyihaga ega boʻlish kerak;
- 5 oylik dasturda Vashingtondagi Xalqaro Demokratik tadqiqotlar forumida ishlashga tayyor boʻlish lozim;
- Dastur davomida boshqa stipendiya dasturlarida qatnashish va stipendiya olish mumkin emas.
Foydali tomonlari
- Dasturda qatnashish bepul;
- Dastur ishtirokchilariga 5 oy davomida yashash xarajatlari uchun oylik stipendiya beriladi;
- Vashingtonga borish va kelish xarajatlari qoplab beriladi;
- Toʻliq jihozlangan ofis bilan taʼminlanadi;
- Shaharlararo telefon qoʻngʻiroqlari va Qoʻshma Shtatlar boʻylab sayohatlar uchun cheklangan miqdordagi mablagʻ beriladi.
Eslatma: oila aʼzolarini oʻzlari bilan Vashingtonga olib kelmoqchi boʻlgan ishtirokchilar oʻz qaramogʻidagi shaxslarning barcha xarajatlarini oʻzlari qoplashlari kerak!
Qoʻshimcha maʻlumotlar
- Tavsiyanomalarni yuborishning oxirgi muddati — 2023-yil 7-noyabr.
- Dastur ishtirokchilari Vashingtonda maʼlum bir mamlakat yoki mintaqada demokratiya istiqbollari bilan bogʻliq loyiha ustida ishlaydilar. Loyihalar demokratik rivojlanishning siyosiy, ijtimoiy, iqtisodiy, huquqiy va madaniy jihatlariga eʼtibor qaratishi va bir qator metodologiya va yondashuvlarni oʻz ichiga oladi.
- Qoʻshma Shtatlarga kelishdan oldin, AQSh fuqarosi yoki doimiy rezidenti boʻlmaganlar Qoʻshma Shtatlarga sayohat qilish uchun J-1 almashinuv vizasini olishlari kerak. Hamrohlik qiluvchi oila aʼzolari J-2 vizasini olishlari kerak.
- Dastur bilan bogʻliq qoʻshimcha savol va takliflarni fellowships@ned.org. emailiga yuborish mumkin.