Qatar universitetida bakalavr bosqichini barcha sohalarda oʻqish uchun toʻliq moliyalashtiriladigan grant — International Students Scholarship

Qatar universiteti bakalavr bosqichida tahsil olish uchun toʻliq moliyalashtiriladigan International Students Scholarship dasturini eʼlon qiladi. Grantni qoʻlga kirita olmaganlar oʻz hisoblaridan kontrakt puli toʻlab oʻqishlari ham mumkin boʻladi.

Grantni qoʻlga kiritgan nomzodlar moliyaviy tomondan toʻliq qoʻllab-quvvatlanadi. Universitet kontrakt puli toʻlab beriladi, oyiga 500 qatar riali (taxminan 137 AQSH dollar) miqdorida stipendiya, turarjoy, bir yilda bir marta borish-kelish uchun aviachipta, oʻqish davomida kerakli kitoblar uchun pul ajratiladi.

Dasturda ishtirok etish uchun nomzodning akademik koʻrsatkichlari yuqori boʻlishi, universitet tomonidan soʻralgan hujjatlarni toʻliq taqdim etishi hamda Qatar universiteti talablariga javob bergan holda universitetga qabul qilinganligi haqida xat olgan boʻlishi kerak.

Maʼlumot uchun: Qatar universiteti eng yaxshi oliygohlardan biri boʻlib, dunyodagi eng yaxshi universitetlar roʻyxatida 208-oʻrinda turadi. Universitet Qatarning Doxa shahrida joylashgan boʻlib, Qatar davlatidagi universitetlar oʻrtasida reytingi birinchi oʻrinda turadi.

Dastur haqida ushbu havola orqali batafsil maʼlumot olish mumkin.

• Nomzod yuqori akademik koʻrsatkichlarga ega boʻlishi kerak (bahоlari kamida 95% boʻlishi kerak);
• Ingliz tilini bilish talab qilinadi;
• Nomzod universitetdan oʻqishga qabul qilinish haqidagi xat olgan boʻlishi lozim;
• Universitet tomonidan soʻralgan barcha hujjatlarni taqdim etishi va talablariga javob berishi kerak;
• Grant taqdim etilgan ishtirokchi oʻsha semestrning oʻzidayoq oʻqishni boshlashi lozim. Grant maʼmuriyati tomonidan belgilangan maʼlum bir sababli holatlardagina oʻqishni bir semestrga kechiktirish imkoniyati mavjud. Agarda nomzod birinchi semestrdan qoldirilsa, grant qaytib olinadi va e-mail orqali xabar beriladi;
• Dasturda ishtirok etish uchun nomzod yaxshi xulq-atvor va hurmatga ega boʻlishi kerak;
• Grant sohibiga aylangan ishtirokchilar ayni damda boshqa grant yoki stipendiyalarga egalik qilishlari taʼqiqlanadi.

Eslatma: Til bilish sertifikatiga qoʻyilgan qatʼiy talablar yoʻq. Biroq arizalarni qabul qilgandan soʻng, qoʻmita nomzodlarning ingliz tili (IELTS yoki TOEFL) va matematika (SAT, ACT, QU Math Placer) boʻyicha standart test ballarini yoki qoʻmita tomonidan tanlangan boshqa test ballarini koʻrib chiqishi mumkin.

Dastur talablari bilan ushbu havola orqali batafsil tanishish mumkin.

• Universitet kontrakt puli dastur tomonidan toʻliq qoplab beriladi;
• Oʻqish davomida kitoblar uchun toʻlanadigan toʻlovlardan ozod qilinadi;
• Har oy 500 qatar riali miqdorida stipendiya taqdim etiladi (taxminan 137 AQSH dollar);
• Talabalar turarjoy bilan taʼminlanadi (ikki kishiga bir xona);
• Universitetga kelish va ketish xarajatlari toʻlanadi;
• Har yili uyiga borib kelish uchun aviachipta puli beriladi;
• Qatar universiteti hamkorligida Qatar davlatida yashash ruxsatnomasi olib beriladi.

Dasturning foydali tomonlari haqida ushbu havola orqali batafsil maʼlumot olish mumkin.

Dasturda qatnashishni istaganlar ushbu havola orqali ariza topshirishlari mumkin.

Dasturga roʻyxatdan oʻtish jarayoni quyidagicha:

1. Onlayn ariza shaklini toʻldiriladi va soʻralgan hujjatlar joylanadi. Hujjatlarning hammasini bittada joylashtirish va ariza shaklini bir vaqtning oʻzida toʻldirish kerak boʻladi. Chunki ariza joʻnatilgandan keyin unga oʻzgartirish kiritib boʻlmaydi. 
2. Ariza qabul qilinganligi haqidagi xabar olinadi. Ariza joʻnatilgandan keyin uch ish kuni ichida ariza qabul qilinganligi haqidagi xabar joʻnatiladi.
3. Ariza koʻrib chiqiladi. Qatar universiteti arizani koʻrib chiqadi va soʻralgan hujjatlar joylanganligi yoki joylanmaganligini nazorat qiladi hamda arizaning qabul qilinganligi yoki qilinmasligini eʼlon qiladi.
4. Intervyu oʻtkaziladi. Arizasi qabul qilingan nomzodlar bilan telefon yoki e-mail orqali bogʻlanib intervyu oʻtkazilishi va vaqti haqida xabar beriladi.
5. Hujjatlarning asl nusxasini topshiriladi. Intervyudan muvaffaqiyatli oʻtgan nomzodlar Qatar universitetiga belgilangan vaqt ichida hujjatlarining asl nusxasini joʻnatishlari kerak boʻladi.
6. Yakuniy natijalar eʼlon qilinadi. Yakuniy natijalarga koʻra qabul qilingan nomzodlarga Qatar universiteti IDʼsi va maʼlum onlayn resurslarga kirish imkoniyati beriladi.

Eslatma! Xalqaro talabalardan viza uchun ham alohida ariza topshirishlari soʻraladi.

Qatar davlati fuqarosi boʻlmagan xalqaro talabalar uchun viza olish jarayoni quyidagicha:

• Agarda nomzod grantni qoʻlga kiritmagan va shunchaki oʻz hisobidan universitetda oʻqimoqchi boʻlsa, bunday nomzodlar Qatar universiteti hamkorligida viza uchun onlayn ariza topshirishlari kerak boʻladi. Shuningdek, ariza topshirish davrida kerakli hujjatlarni ham yuklashlari talab qilinadi;
• Agarda nomzod Qatar universitetida oʻqish uchun grantni qoʻlga kiritgan boʻlsa (yaʼni ushbu sahifadagi grantni), ular viza uchun onlayn ariza toʻldirishlari shart emas. Bu jarayon xalqaro qabul boʻlimi tomonidan amalga oshiriladi.

Muhim! Yuqoridagi kategoriyaga kirmaydigan nomzodlar Qatar universitetida oʻqiy olmaydilar. Qatar universitetiga ariza topshirish uchun 200 qatar riali (taxminan 54 AQSH dollar) miqdorida badal puli mavjud. Ariza topshirish toʻlovini toʻlamagan nomzodlarning arizalari koʻrib chiqilmaydi.

Dasturga ariza topshirish muddatlari haqida ushbu havola orqali batafsil maʼlumot olish mumkin.

Ariza topshirish bosqichlari bilan batafsil ushbu havola orqali maʼlumot olish mumkin.

Qatar universitetida grantni qoʻlga kiritmagan holda oʻz hisobidan oʻqimoqchi boʻlgan nomzodlar ushbu havola orqali roʻyxatdan oʻtishlari mumkin.

• Tel: +974 4403-3333; (Asosiy telefon raqami); +974 4403-4444; (Talabalar uchun markaz raqami);
• Email: QUMCC@qu.edu.qa.

Dastur haqida quyidagi ijtimoiy tarmoqlar orqali ham maʼlumot olish mumkin:

• Twitter;
• Instagram;
• Snapchat;
• Linkedin;
• Facebook;
• Youtube;
• Rss. 

Hujjatlar joʻnatilishi soʻralgan nomzodlar quyidagi manzilga yuborishlari mumkin:

Graduate Admissions Section,
Admission and Registration,
Qatar University.
PO Box 2713
Doha, Qatar.