Qozogʻistonda 6 haftalik yozgi tadqiqot dasturi — ISSAI Summer Research Program

Qozogʻistonning Ostona shahrida joylashgan Nazarboyev universiteti huzuridagi Aqlli tizimlar va sunʼiy intellekt instituti (ISSAI) tomonidan 6 haftalik yozgi tadqiqot dasturi — ISSAI Summer Research Program taqdim etiladi.

Dastur sunʼiy intellekt va boshqa ilgʻor texnologiyalar boʻyicha amaliy tajriba orttirishni istagan maktab oʻquvchilari (9–12-sinflar) hamda universitet talabalari (bakalavriat, magistratura va PhD bosqichlari) uchun moʻljallangan intensiv, ilmiy-tadqiqotga yoʻnaltirilgan dasturdir.

Dastur davomida ishtirokchilar haqiqiy tadqiqot vazifalari ustida ishlaydi, muammo yechish koʻnikmalarini mustahkamlaydi va zamonaviy sunʼiy intellekt tizimlari qanday yaratilishi, sinovdan oʻtkazilishi hamda takomillashtirilishi haqida chuqurroq tushunchaga ega boʻladilar.

Grant asosida qatnashishni istaganlar test topshirishlari kerak boʻladi. Toʻlov asosida qatnashishda baholash testi topshirish talab etilmaydi.

Yozgi tadqiqot dasturi 2026-yilning iyun-iyul oylarida oʻtkazilishi rejalashtirilgan. Dastur toʻliq ingliz tilida olib boriladi va barcha seminarlar oflayn tarzda olib boriladi.

Dastur haqida batafsil ushbu havola orqali maʼlumot olish mumkin.

• Dasturga sunʼiy intellekt, maʼlumotlar ilmi, robototexnika va tegishli sohalarga qiziqqan maktab oʻquvchilari (9–12-sinflar), bakalavriat va magistratura talabalari hamda ilmiy faoliyatini endi boshlayotgan tadqiqotchilar qatnashishi mumkin;
• Ingliz tilini dasturda qatnashish darajasida bilish lozim;
• Kuchli motivatsiya va tegishli akademik tayyorgarlik hisobga olinadi;
• Grant uchun baholash testida eng yuqori natijalarni koʻrsatish va dastur talablariga toʻliq javob berish lozim.

• Dastur yakunida sertifikat beriladi;
• Deep Learning, Generativ AI va Computer Vision boʻyicha kurslar hamda amaliy seminarlar orqali kuchli nazariy bilimlar beriladi;
• Superkompyuter infratuzilmasidan foydalanish imkoniyati;
• Data scientistlar, AI tadqiqotchilari va dasturiy taʼminot muhandislaridan individual mentorlik yordami beriladi;
• Nazarboyev universitetining Robototexnika laboratoriyalaridan foydalanish;
• Generativ AI boʻyicha davom etayotgan loyihalarda ishtirok etish;
• Ilmiy maqolalarga hammualliflik qilish va taqrizdan oʻtadigan (peer-reviewed) ilmiy ishlarga hissa qoʻshish;
• Nazarboyev universiteti professorlaridan rasmiy tavsiyanomalar olish imkoniyati.

Dasturda 2 xil usulda ishtirok etish mumkin:

1. Grant asosida ishtirok etish dasturda bepul ishtirok etish va universitet kampusida yashash xarajatlarini oʻz ichiga oladi.
2. Toʻlov asosida ishtirok etishda nomzod 1,200,000 KZT (~ $2500) toʻlov qiladi. Bunga universitet kampusidagi yashash xarajatlari kiradi.

Erta qabul qilingan ishtirokchilar uchun chegirmalar mavjud:

• 1,000,000 KZT (~ $2100) — 2026-yil 31-martgacha toʻlov amalga oshirilsa;
• 1,100,000 KZT (~ $2300) — 2026-yil 30-aprelgacha toʻlov amalga oshirilsa;
• 1,200,000 KZT (~ $2500) — 2026-yil 31-maygacha toʻlov amalga oshirilsa.

Eslatma: Toʻlovni 50% dan ikki boʻlib toʻlash imkoniyati mavjud. Yoʻl xarajatlari ishtirokchilar tomonidan qoplanadi.

Dasturga qiziqqanlar quyidagi havolalar orqali ariza topshirishlari mumkin:

• Maktab oʻquvchilari uchun ariza shakli;
• Universitet talabalari uchun ariza shakli.

Ariza topshirish quyidagi yoʻnalishlardan iborat:

1. Shaxsiy va akademik maʼlumotlar. Asosiy shaxsiy maʼlumotlar va taʼlim boʻyicha maʼlumotlar kiritiladi.
2. Yoʻnalishni tanlash. Ariza topshirayotgan tadqiqot yoʻnalishi haqida maʼlumotlar yoziladi.
3. Zarur hujjatlarni yuklanadi:
   1. CV (qoʻshimcha ravishda diplomlar, sertifikatlar va boshqalar);
   2. Motivatsion xat;
   3. Eng soʻnggi oʻqish davri uchun akademik transkriptlar (oxirgi yil, semestr yoki chorak).
4. Test sanasini tanlash (faqat grant uchun ariza topshiruvchilardan test topshirish soʻraladi). Test arizalar qabul qilish muddati tugagandan soʻng oʻtkaziladi va faqat grant asosida (bepul) ishtirok etish uchun ariza topshirgan nomzodlar uchun majburiy hisoblanadi.

• Dasturga hujjat topshirish uchun oxirgi muddat: 29-mart 2026-yil;
• Tel: +7 (7172) 70-5981/+7 (7172) 70-6139
• Email: issai@nu.edu.kz.

Quyidagi ijtimoiy tarmoqlar orqali qoʻshimcha maʼlumot olish mumkin:

• Instagram;
• YouTube;
• Linkedin;
• Twitter.