Rossiyaning Skolkovo fan va texnologiyalari institutining magistratura va PhD bosqichida oʻqish uchun toʻliq moliyalashtiruvchi Skoltech grant dasturi

Skoltech Grant Dasturi - Rossiyaning Skoltech oliygohida magistratura va PhD bosqichida oʻqish uchun 400 ga yaqin oʻrin ajratuvchi, oʻquv xarajatlarini toʻliq moliyalashtiruvchi dasturdir.

Skoltech — Skolkovo fan va texnologiya oliygohining magistratura va PhD bosqichlarida oʻqish niyatidagi nomzodlar uchun hech qanday toʻlovlarsiz xalqaro almashinuv imkoniyatlariga ega boʻlgan taʼlim hamda jahon darajasidagi professor-oʻqituvchilarda tahsil olish imkoniyatini taqdim etadi.

Magistratura bosqichida oʻqish uchun sohalar:

• Data science;
• Amaliy hisoblash mexanikasi;
• Hayot haqidagi fanlar;
• Keyingi avlod aloqa texnologiyalari;
• Materialshunoslik;
• Matematika va nazariy fizika;
• Muhandislik tizimlari.

PhD bosqichida oʻqish uchun sohalar:

• Matematika va mexanika;
• Fizika;
• Materialshunoslik va muhandislik;
• Tabiiy fanlar;
• Hisoblash va maʼlumotlar ilmi hamda muhandislik;
• Muhandislik tizimlari;
• Neft muhandisligi.

Dastur maqsadi Rossiya va jahon hamjamiyati rivojiga hissa qoʻshuvchi talabalarni tayyorlash, ijtimoiy-iqtisodiy rivojlanishni qoʻllab-quvvatlash hamda ilmiy va texnologik kashfiyot va yangiliklar yaratishdan iborat.

Dasturga qabul qilingan talabalar Rossiyaning nufuzli oliygohida bepul taʼlim olish bilan birga, oylik stipendiya bilan taʼminlanadilar.

Dasturda ishtirok etishi uchun nomzodlar quyidagi talablarga javob berishi lozim:

• Nomzod oʻz tanlagan yoʻnalishga aloqador sohada magistratura bosqichini davom ettirish uchun bakalavr bosqichini, PhD bosqichi uchun magistraturani tamomlagan boʻlishi kerak;
• Akademik yuqori koʻrsatkichlarga ega boʻlishi kerak;
• Ingliz tili bilish darajasini tasdiqlovchi til sertifikati. IELTS — 5.5; TOEFL iBT- 75, TOEFL ITP – 450 daraja talab etiladi. Til sertifikati mavjud boʻlmagan taqdirda saralashning oxirgi bosqichida nomzodlar maxsus TOEFL ITP imtihonidan oʻtkaziladi;
• GRE sertifikati majburiy emas, lekin ushbu imtihondan yuqori ballga ega boʻlgan nomzodlarga ustunlik berishi mumkin.

Dastur talablari haqida batafsil ushbu havola orqali maʼlumot olish mumkin.

Dasturga qabul qilinganlar quyidagi imtiyozlarga ega boʻladi:

• Oʻqish kontrakt toʻlovidan ozod etiladi;
• Akademik koʻrsatkichlariga qarab tayinlanadigan oylik stipendiyaga ega boʻladi. Stipendiya miqdori kamida oyiga 40,000 rublni (taxminan $460) tashkil etadi;
• Tibbiy sugʻurta xarajatlari (oʻquv yili davomida)qoplanadi;
• Rossiya va turli xorijiy universitetlar bilan tashkillashtirilgan akademik almashinuv dasturlarida ishtirok etish imkoniyatiga ega boʻladi;
• Malakali professorlarning maʼruzalari va ilmiy rahbarligida zamonaviy taʼlim olishga yordam beruvchi oʻquv dasturi yordamida sifatli taʼlim oladi;
• Kurslar tanlashda erkinlik beriladi;
• Chet el universitetlari va xalqaro konferensiyalarga tashrif buyurish imkoniyatiga ega boʻladi;
• Talabalarning start-up loyihalari qoʻllab-quvvatlanadi;
• Ilm-fan va texnologiyalarning turli sohalarida yuqori malakaga ega olimlar, muhandislar va tadbirkorlarni birlashtirgan ilmiy, xalqaro muhitda taʼlim oladi;
• Imkoniyati cheklanganlar uchun kirish imtihonlari boʻyicha qator yengilliklar tashkil etilgan.

Dastur manfaatli jihatlari haqida batafsil ushbu havola orqali maʼlumot olish mumkin.

Magistratura bosqichi uchun ariza topshirish va saralash jarayonlari 3 bosqichdan iborat:

• 1-bosqich. Onlayn ariza topshirish. Arizalar onlayn tarzda topshiriladi;

Ariza uchun talab qilinuvchi hujjatlar:

1. Rezyume\ CV;
2. 2 ta Tavsiyanoma;
3. Motivatsion xat;
4. Til sertifikati (IELTS\TOEFL);

• 2-bosqich. Onlayn test topshirish. Avvalgi yil imtihon savollar namunasi bilan ushbu havola orqali tanishish mumkin;
• 3-Bosqich. Intervyu va ingliz tilidan imtihon topshirish. Ushbu bosqichda faqatgina arizalarni muvaffaqiyatli topshirgan va testda yuqori natijaga erishgan nomzodlar qatnasha oladi. 3-bosqichda nomzodlar Skoltech binosida intervyu topshirishadi hamda ingliz tili boʻyicha imtihon qilinadi.

Magistratura bosqichiga hujjat topshirish haqida batafsil ushbu havola orqali maʼlumot olish mumkin.

PhD bosqichi uchun ariza topshirish jarayoni. PhD bosqichi uchun ariza topshirish va saralash jarayonlari 2 bosqichdan iborat:

• 1-bosqich. Onlayn ariza topshirish. Arizalar ushbu havola orqali topshiriladi.

Ariza uchun talab qilinuvchi hujjatlar:

1. Rezyume\ CV;
2. Motivatsion xat;
3. Til sertifikati (IELTS\TOEFL);
4. Baholar tabeli nusxasi (asl va tarjima qilingan tillarda);
5. Graduate Record Examination (GRE)- bitiruv imtihonlari natijalari (ixtiyoriy);

Eslatma: PhD bosqichi uchun ariza topshiruvchi nomzodlar dastavval Skoltech fakultetlari profillarini koʻrib, tanishib chiqishlari, oʻzlari doktorlik dissertatsiyasi yoqlamoqchi boʻlgan fakultet aʼzolari bilan tanishib chiqishlari va ular bilan aloqada boʻlib turishlari tavsiya etiladi.

• 2-bosqich. Intervyu va Ingliz tilidan imtihon topshirish. Ushbu bosqichga faqatgina arizalarni muvaffaqiyatli topshirgan nomzodlar taklif etiladi. Tanlov kunlari davomida ishtirokchilar intervyu va ingliz tili (TOEFL yoki IELTS sertifikatiga ega boʻlmaganlar uchun) testidan oʻtadilar.

Doktoranturaga hujjat topshirish yoʻriqnomasi bilan batafsil ushbu havola orqali tanishish mumkin.

Magistratura bosqichi uchun arizalar 2025-yil 7-iyulgacha, PhD bosqichi uchun esa 2025-yil 1-iyulgacha qabul qilinadi.

Eng koʻp berilgan savollar va ularning javobi bilan ushbu havola orqali tanishish mumkin.

Dastur haqida batafsil ushbu havola orqali maʼlumot olish mumkin.

Qoʻshimcha murojaatlar uchun:
Email: admissions@skoltech.ru
Tel: +7 (495) 280-14-81 ext. 3387