Shvetsiyada xarajatlari qoplanadigan 5 kunlik yozgi dastur — Armament and Disarmament Summer School

Qurolsizlanish, yadro qurollarini tarqalishini oldini olish va qurollarni nazorat qilish sohasidagi yangi avlod mutaxassislari uchun Shvetsiyada 5 kunlik yozgi dastur — Armament and Disarmament Summer School 2026 taqdim etiladi.

Dasturga 25 nafar eng yaxshi deb topilgan nomzod saralab olinadi.

Yozgi dasturning asosiy maqsadi butun dunyodan kelgan yuqori malakali tadqiqotchilar va amaliyotchilardan iborat kuchli jamoani yaratishga hissa qoʻshishdir. Bu jamoa xavfsiz, tinch va barqaror kelajakni shakllantirish va targʻib qilish ustida ishlaydi.

Ishtirokchilar kurs davomida quyidagi faoliyatlarni amalga oshiradilar:

• Ushbu sohada yetakchi mutaxassislar tomonidan maʼruza va muhokamalar;
• Koʻnikmalarni rivojlantirish boʻyicha seminarlar va treninglar;
• Qurollanish va qurolsizlanish masalalari bilan shugʻullanuvchi muassasalarga tashriflarda qatnashish.

Yozgi maktab 2026-yil 24–28 avgust kunlari Shvetsiyada joylashgan Stokgolm tinchlik muammolarini oʻrganish xalqaro instituti (SIPRI) binosi va Uppsala Universitetidagi Yadro qurollarini qisqartirish boʻyicha Alva Myrdal Markazida (AMC) boʻlib oʻtadi.

Dastur haqida batafsil ushbu havola orqali maʼlumot olish mumkin.

• Dasturda talaba, tadqiqotchi, siyosat boʻyicha mutaxassis (policymakers), amaliyotchi yoki boshqa kichik mutaxassislar qatnashishi mumkin;
• Nomzodlar davlat yoki nodavlat tashkilotlar, hamda tahlil markazlari (think tanks) bilan bogʻliq tegishli profilga ega boʻlishi kerak;
• Ishtirokchilar kurs boshlanishidan oldin bakalavr darajasiga ega boʻlishi shart yaʼni hozir universitetda oʻqiyotgan yoki yaqinda bitirgan boʻlishlari lozim;
• Ingliz tilini yuqori darajada bilish talab qilinadi;
• Ayollar, yetarlicha vakilligi boʻlmagan guruhlar va rivojlanayotgan mamlakatlardan boʻlgan nomzodlar ariza topshirishga ragʻbatlantiriladi.

Muhim: Avval yozgi maktabda qatnashganlar ariza topshirish huquqiga ega emas.

Tanlov qoʻmitasi qatnashchilar orasida gender, geografik joylashuv va turli akademik yoʻnalishlarni hisobga olgan holda xilma-xillik, tenglik va inklyuzivlikni qoʻllab-quvvatlaydi.

Agar nomzod talab qilsa qatnashish uchun zarur boʻlgan barcha asosiy xarajatlar qoplanadi:

• Stokgolmgacha poyezd yoki samolyot xarajatlari;
• Viza xarajatlari;
• Sayohat sugʻurtasi;
• Shvetsiyadagi mahalliy transport xarajatlari;
• Oziq-ovqat va turar joy xarajatlari.

Eslatma: Boshqa shaxsiy xarajatlar esa qatnashchining oʻz hisobidan amalga oshiriladi.

Dasturga qiziqqanlar ushbu havola orqali ariza topshirishlari mumkin.

Hujjat topshirishda quyidagilar soʻraladi:

• Shaxsiy maʼlumotlar;
• Aloqa maʼlumotlari;
• CV. Bunda tegishli akademik yoki professional tajriba koʻrsatilgan boʻlishi kerak. Shuningdek, ikkita tavsiyanoma beruvchi shaxsning (reference) ismi va aloqa maʼlumotlari ham kiritilishi lozim;
• Shaxsiy xat (Personal letter);
• Boshqa kerakli hujjatlar. Masalan, bitta hujjat (document) quyidagilarni oʻz ichiga olishi kerak:
  • 1 sahifalik motivatsion xat (cover letter):
    • Nima uchun bu kursda qatnashmoqchisiz?
    • Nima uchun aynan siz tanlanishingiz kerak?
  • Yarim sahifalik tavsiyanoma (endorsement). U hozirgi yoki avvalgi rahbaridan olingan boʻlishi kerak;
• Hozirda yashash manzili;
• 2026-yil avgust oyida qaysi mamlakat va shaharda boʻlishi;
• Qanday darajadagi moliyaviy homiylik soʻrashi;
• Taʼlim darajasi;
• Taʼlim yoʻnalishi;
• Mavzu bilan bogʻliq ish yoki tadqiqot turi;
• Ish yoki tadqiqotni qaysi muassasa yoki muhitda olib borishi;
• Mavzu boʻyicha ish yoki tadqiqot olib borishda orttirgan tajribasi;
• Qaysi mavzularga qiziqishi:
  • Developments in armaments;
  • Dual-use and arms trade control;
  • Nuclear forces and OSINT;
  • Weapons of Mass Destruction;
  • Nuclear deterrence and arms control;
  • Military artificial intelligence.
• Dasturdan olgan bilim va koʻnikmalardan kelajakda qanday usulda foydalanishi.

Muhim: Nomzodlar arizalarini yaxshilash uchun sunʼiy intellektdan foydalanishlari mumkin.

Biroq ehtiyot boʻlish tavsiya qilinadi. Chunki sunʼiy intellektga haddan tashqari tayanilgan arizalar avvalgi yillarda raqobatbardosh deb topilmagan.

• Dasturga hujjat topshirish uchun oxirgi muddat: 17-mart 2026-yil;
• Natijalar eʼloni: 2026-yil aprel oyining oxirigacha;
• Email: summerschool@sipri.org.