Tadqiqotchi olimlar, doktorant va mustaqil izlanuvchilar uchun akademik ingliz tilini bepul oʻrganish imkoniyati — “English for Science” kursining 4-mavsumi

Umumiy maʻlumotlar

Oliy ta’lim fan va innovatsiyalar vazirligi tashabbusi bilan Jahon Bankining “O‘zbekiston milliy innovatsion tizimini modernizatsiya qilish” (MUNIS) loyihasining  moliyaviy ko‘magi doirasida respublikamizning tadqiqotchi olimlari uchun bepul “English for Science” o‘quv dasturining 4-mavsum tanlovlari boshlandi.

Dasturda ingliz tilidan B1 darajaga ega boʻlgan mahalliy olimlar, doktorant va mustaqil izlanuvchilar ishtirok etishi mumkin. Darslar 6 oy davomida ingliz tilida olib boriladi.

Loyihaning asosiy maqsad va mohiyati:
– mahalliy olimlar, doktorant va mustaqil tadqiqotchilar, magistrlar va o'izga ishongan baklavrlarga yetakchi xalqaro ilmiy jurnallarda o‘z maqolalarini nashr etishlarida amaliy yordam berish;
– tadqiqot natijalarini tijoratlashtirish uchun xorijiy moliyalashtirish manbalarini (grantlar) izlashdagi faolligini oshirishga ko‘maklashish;
– yetakchi ilmiy-texnik ma’lumotlar bazalari (Web of Science, Scopus, Springer, Wiley va boshqalar) dan foydalanish ko‘rsatkichini oshirish;
–  tadqiqotchilarning yo‘nalishlari va ixtisosliklari bo‘yicha akademik ingliz tili bilim va ko‘nikmalarini oshirishdan iborat.

Kurs davomida ishtirokchilar akademik ingliz tili boʻyicha saboq olish bilan birga, ilmiy tadqiqot ishlarini rivojlantirish va ilmiy ishlanmalarini xalqaro jurnallarda chop etish imkoniyatlari bilan batafsil tanishishadi.

Dastur mentorlari qatorida barcha fan sohalari bo‘yicha AQSh, Avstriya, Germaniya, Yaponiya, Xitoy, mamlakatlarida tahsil olgan yuqori tajribaga ega mutaxassislar (PhD, DSc) ishtirok etishadi.