Tadqiqotchilar uchun 12 oylik rezidentlik dasturi — Research Accelerator Residency Program

Ijtimoiy Siyosat Laboratoriyasi (ISLAB) tomonidan Abdul Latif Jameel Poverty Action Lab (J-PAL) bilan hamkorlikda tadqiqotchilar uchun 12 oylik onlayn dastur — Research Accelerator Residency Program taqdim etiladi.

Dasturdan asosiy maqsad tadqiqot faoliyatini endi boshlayotganlarga taʼsirni baholash, ijtimoiy siyosat va rivojlanish iqtisodiyoti yoʻnalishlarida tegishli koʻnikmalarni mustahkamlashda yordam berish hamda Oʻzbekistonga oid mustaqil yoki hamkorlikdagi tadqiqot loyihalarini rivojlantirishni qoʻllab-quvvatlashdan iborat.

Tanlangan ishtirokchilar mentorlik va texnik treninglarda qatnashish va MIT DEDP dasturining ayrim kurslaridan foydalanish imkoniyatiga ega boʻlishadi. Ushbu kurslar rivojlanish iqtisodiyoti, maʼlumotlarni tahlil qilish hamda siyosat boʻyicha ilgʻor bilimlarni taqdim etadi.

Ishtirokchilar 1 ta seminar va MIT DEDP MicroMasters Program doirasidagi 2 ta onlayn kursdan iborat oʻquv dasturida oʻqishadi:

• Designing and Running Randomized Evaluations;
• Data Analysis for Social Science.

Dastur 2026-yil 12-may kuni boshlanishi rejalashtirilgan.

Maʼlumot uchun: Research Accelerator Residency Program rezidentlik dasturi nafaqat individual loyihalarni rivojlantirishga, balki mamlakatdagi tadqiqot ekotizimini mustahkamlashga, siyosatga mos va puxta tadqiqot olib boruvchi olimlar hamjamiyatini kengaytirishga hamda mintaqada taʼsirni baholash yoʻnalishida uzoq muddatli yetakchilikni rivojlantirishga qaratilgan.

Dastur haqida batafsil ushbu havola orqali maʼlumot olish mumkin.

Dasturda ishtirok etish uchun asosiy mezonlar:

• Oʻzbekistonda (ustuvor) yoki Markaziy Osiyoning boshqa hududlarida istiqomat qilayotgan barcha qatnashishi mumkin;
• Kamida bakalavr darajasiga ega boʻlish lozim. Iqtisodiyot, davlat siyosati, statistika yoki boshqa tegishli ijtimoiy fanlar yoʻnalishida PhD talabalari va yaqinda magistraturani tugatganlarga ustunlik beriladi;
• 12 oylik rezidentlik davrida faol ishtirok etishga tayyor boʻlish kerak. Dastur asosan onlayn tarzda oʻtkaziladi, ammo xohlovchilar uchun Social Policy Lab ish maydonidan foydalanish imkoniyati mavjud.

Nomzodlardan quyidagilar talab etiladi:

• Tadqiqot muhitida ishlash tajribasi;
• Taʼsirni baholash, ijtimoiy himoya, rivojlanish iqtisodiyoti, taʼlim, sogʻliqni saqlash yoki shunga oʻxshash sohalarga kuchli qiziqish;
• Kuchli analitik va miqdoriy masalalarni tahlil qilish koʻnikmalari;
• Statistik dasturlash boʻyicha ishlash koʻnikmasi (R, Stata yoki Python);
• Ingliz tilini bilish (oʻqish va yozish darajasida).

Muhim: Oʻzbekistonga oid tadqiqot loyihalari bilan chet elda oʻqiyotgan yoki ishlayotgan Oʻzbekiston fuqarolari ham ariza topshirishlari tavsiya etiladi.

• Dastur davomidagi barcha treninglar moliyalashtiriladi;
• Mahalliy va xalqaro olimlar tomonidan seminarlar oʻtiladi;
• Turli mentorlik va texnik treninglarda qatnashish;
• Social Policy Lab tadqiqotchilari bilan yaqin hamkorlikda ishlash;
• Tegishli soha boʻyicha amaliy tadqiqot olib borish imkoniyati.

Dasturga qiziqqanlar ushbu havola orqali ariza topshirishlari mumkin.

Hujjat topshirishda quyidagilar soʻraladi:

• Ariza shakli;
• CV;
• Tadqiqot taklifi (maksimal 1,200 ta soʻz). Unda quyidagilar koʻrsatilishi lozim:
• Tadqiqot savoli;
  • Siyosat bilan bogʻliqligi;
  • Mavjud adabiyotlar doirasidagi kontekst;
  • Taklif etilgan metodologiya;
  • Loyihaning hozirgi bosqichi;
  • Mentorlikda qaysi sohalarda yordam olishni xohlayotgani.

Ariza topshirish bosqichlari:

1. Tanlangan video asosida tayyorlangan soʻrovnoma;
2. Oʻzini tanishtirish, motivatsiyani bayon qilish va tadqiqot taklifini qisqacha tasvirlash uchun boʻlim (18 ta savol);
3. Qoʻshimcha hujjatlarni (CV va tadqiqot taklifi) topshirish uchun yakuniy boʻlim.

Muhim: Arizalar bosqichma-bosqich koʻrib chiqiladi, shuning uchun imkon qadar erta hujjat topshirish tavsiya etiladi.

Tadqiqot taklifini muhokama qilish uchun onlayn suhbatda ishtirok etish soʻralishi mumkin.

• Dasturga hujjat topshirish uchun oxirgi muddat: 14-aprel 2026-yil;
• Natijalar eʼlon qilinadi: 30-aprel 2026-yil;
• Birinchi onlayn kurs may oyidan avgust oyigacha, ikkinchisi esa sentyabr oyidan dekabr oyigacha davom etadi. Kutilayotgan ish yuklamasi haftasiga 12-14 soatni tashkil qiladi;
• Dastur boʻyicha qoʻshicha savollar bilan Diydor Berdiklichev (berdiklichev@socialpolicylab.uz) yoki Anna Subiranaga (asubiranabofill@povertyactionlab.org) murojaat qilish mumkin;
• Takroran soʻraladigan savollarga javob bu yerda.