Tayyor mahsulot yoki g'oya uchun “Eng yaxshi innovatsion loyiha” tanlovi

“Adolat” milliy huquqiy axborot markazi tomonidan “Eng yaxshi innovatsion loyiha” tanlovi oʻtkaziladi.
Tanlovda Oʻzbekiston Respublikasining 18 yoshga toʻlgan fuqarolari qatnashishi mumkin.

Tanlovga huquqiy targʻibot boʻyicha eng yaxshi innovatsion loyiha sifatida 2022-yil 1-noyabrgacha faoliyati yoʻlga qoʻyilgan hamda aholining huquqiy ongi va huquqiy madaniyatini yuksaltirishga xizmat qiluvchi va oxirgi 3 oy davomida faoliyat yuritib kelgan texnik ishlanmalar (veb-sayt, platforma, mobil ilova va boshqa texnik usullar yordamida ishlovchi ishlanmalar) hamda huquqiy targʻibotni amalga oshiruvchi innovatsion gʻoyalar taqdim etiladi.

3 nafar g'olibga qimmatbaho sovg'alar topshiriladi. Tanlov haqida batafsil bu yerda o'qish mumkin.

• Tanlovda Oʻzbekiston Respublikasining 18 yoshga toʻlgan fuqarolari qatnashishi mumkin;
• Tanlov ishtirokchilari guruh boʻlib yoki yakkaxon holda ishtirok etish mumkin.

Eng koʻp ball toʻplagan 3 nafar ishtirokchi gʻolib deb topiladi.

Gʻoliblar diplom hamda tegishlicha quyidagi sovgʻalar bilan taqdirlanadi:

• 1-oʻrin: noutbuk;
• 2-oʻrin: planshet;
• 3-oʻrin: televizor.

Tanlov quyidagi tartibda tashkil etiladi:

– ishtirokchilarni roʻyxatga olish (2022-yil 10-dekabrgacha);

– saralash (2022-yil 15-dekabrgacha);

– gʻoliblarni aniqlash (2022-yil 20-dekabrgacha).

Shunga koʻra, ishtirokchilar 2022-yil 10-dekabrgacha @adolattanlovi_bot telegram boti orqali quyidagi hujjatlarni taqdim etishi kerak:

– rezyume;

– taqdim etilayotgan innovatsion gʻoya yoki texnik ishlanma (Internet tarmogʻi orqali ishlatishga tayyor mahsulot va veb-dastur);

– huquqiy targʻibot sohasidagi innovatsion loyihaning batafsil tavsifi, maqsadi, ishlab chiqish bosqichlari, isteʼmol bozoriga chiqish bosqichlari, joriy etish, talab, tijoriy maqsadlari, gʻoyani joriy etishdan kutilayotgan natija va xarajatlar.

Saralash bosqichida 10 nafar qatnashchining loyihalari tanlab olinadi.

Navbatdagi bosqich – suhbat. Suhbat davomida ishtirokchi tomonidan ishlab chiqilgan loyihaning oʻziga xosligi, ahamiyati, dolzarbligi, kreativligi hamda fuqarolarning huquqing ongi va madaniyatini yuksaltirishdagi oʻrni hayʼat aʼzolari va ekspertlar tomonidan baholanadi.

Tanlovda qatnashish uchun hujjatlar 2022-yil 10-dekabrgacha @adolattanlovi_bot telegram boti orqali qabul qilinadi.

Tanlovda quyidagilar taqiqlanadi:

– tanlov shartlariga mos boʻlmagan yosh kategoriyasi boʻyicha ishtirok etish;

– haqiqiy boʻlmagan loyiha maʼlumotlarini roʻyxatdan oʻtkazish;

– nominatsiya tavsifiga toʻgʻri kelmagan loyiha topshirish;

– ishtirokchi tomonidan shunga oʻxshash tanlov va loyihalarda ishtirok etish uchun ariza topshirish;

– plagiat holatlariga yoʻl qoʻyish.

Tanlov yakunlariga koʻra, hayʼat aʼzolarining umumiy xulosasiga asosan gʻolib aniqlanmasligi ham mumkin. Bunda komissiya tomonidan gʻolib ishtirokchi aniqlanmaganligi sababi izohlab beriladi.