Texnologiya va IT sohasiga qiziquvchilar uchun Germaniyada qo'shma magistrlik dasturi

Dual Study Masterʼs Degree dasturi bakalavr bosqichini tamomlagan hamda texnologiya va IT sohasiga qiziquvchilarning magistratura bosqichida tahsil olishlari uchun tashkil qilingan. Bu qoʻshma dastur boʻlib, dastur gʻoliblari tanlagan sohalariga qarab Ingolstadt University of Applied Sciences (TUI) yoki Technical University of Munich (TUM) universitetlaridan birida tahsil olishlari imkoniyatiga ega boʻlishadi. Universitetda amaliy va nazariy darslar boʻlib oʻtadi. Amaliy darslar Audi tomonidan oʻtkaziladi.

Dastur davomiyligi TUIda 2 yil, TUMda esa 2,5 yil. Oʻqish oxirida magistr darajasi beriladi. Oʻqish davomida talabalarga oylik pul toʻlanadi. Shuningdek, semestrlik almashinuv dasturlarida qatnashish imkoni ham mavjud.

Dastur haqida ushbu havola orqali batafsil ma'lumot olish mumkin.

Dasturga ariza topshirish uchun nomzodlar quyidagi talablarga javob berishlari lozim:

• Dasturga ariza topshirish vaqtida Germaniyadagi akkreditatsiyadan o'tgan universitetlardan birida magistraturaning birinchi semestrida tahsil olayotgan bo'lish kerak;
• Nomzodlar universitet talablariga toʻgʻri keladigan bakalavr darajasini tamomlagan boʻlishlari kerak;
• Ushbu sohadagi akademik almashinuv dasturlari yoki bitiruv malakaviy ishlari boʻyicha tajribaga ega boʻlishi lozim;
• Nomzod transportning kelajakdagi yangi turlari va sohalariga qiziqishi kerak;
• Nomzodning yangi texnologiyalar hamda trendlarga qiziqishi boʻlishi zarur;
• Ingliz tili va nemis tilini (C1) bilish talab qilinadi;

Dastur talablari haqida ushbu havola orqali batafsil maʼlumot olish mumkin.

Dastur gʻoliblari quyidagi imkoniyatlarni qoʻlga kiritishadi:

• Oʻqish va amaliyot davrida ham har oy pul beriladi;
• Nomzodlar agar xohlasa chet elda semestrlik almashinuv dasturlarida oʻqish imkoniyatiga ega boʻlishadi;
• Oʻqishni muvaffaqiyatli tamomlaganlar yaxshi ish bilan taʼminlanadi;
• Leksiyadan boʻsh boʻlgan vaqtlarda AUDI AGda har bir oʻquvchi uchun amaliy mashgʻulotlar boʻlib oʻtadi. Talabalar bu yerda turli xil loyihalar ustida ishlashlari mumkin, bu esa tezroq rivojlanish va oʻz karyeralarini shakllantirishga yordam beradi;
• Amaliyot boʻladigan semestr davomida talabalar dunyoning eng mashhur joylaridan birida  xalqaro tajriba toʻplash imkoniga ega boʻlishadi;
• Nomzodning tanlagan sohasiga qarab ular Technical University of Ingolstadt (TUI) yoki Technical University of Munich (TUM)dan birida tahsil olishadi.

Dasturning foydali jihatlari haqida ushbu havola orqali batafsil bilib olish mumkin.

Dasturda qatnashish uchun quyidagilar talab qilinadi:

• Onlayn roʻyxatdan oʻtish;
• Nomzodlarning dasturga tanlab olinishi uchun kerak boʻladigan hujjatlar: universitet diplomi va boshqalar;
• Covering letter va CV dasturda gʻolib boʻlishda yordam berishi mumkin.

Soʻralgan hujjatlarni skaner qilish va ariza toʻldirish qismidagi “attachments” boʻlimida PDF yoki JPG formatida yuklash kerak boʻladi.

Ariza topshirish uchun avval yoʻnalish tanlab keyin oʻsha yerdan roʻyxatdan oʻtiladi. Ushbu dasturda quyidagi sohalar boʻyicha tahsil olish mumkin:

• Robotics, Cognition, Intelligence;
• Computer science;
• Electrical Engineering for Mobile Systems;
• Taxation and Accounting;

Nomzodlar yozma arizani topshirishgandan soʻng, ulardan kasbiy salohiyatlarini tekshirish uchun test olinadi. Ushbu testni 14 kun ichida topshirish talab qilinadi. Test natijalari yaxshi chiqqanlar esa maʼmuriyat tomonidan saralab olinadi. Dastur roʻyxatga olishi tugagandan keyin taxminan ikki hafta oʻtib, natijalar eʼlon qilinadi.

Tahsil olish uchun mavjud sohalar roʻyxati bilan ushbu havola orqali batafsil tanishib chiqish mumkin.

Roʻyxatdan oʻtish jarayoni haqida ushbu havola orqali batafsil maʼlumot olish mumkin.

Dastur haqida eng koʻp soʻralgan savollar va ularning javoblarini ushbu havola orqali koʻrish mumkin.

Dastur haqida qoʻshimcha savollar boʻlgan taqdirda quyidagi elektron manzilga murojaat qilish soʻraladi:

E-mail: audi-dual-ingolstadt@audi.de