Tibbiyot va media sohasi vakillari uchun Rio-de-Janero shahrida xarajatlari toʻliq qoplanadigan AIDS 2026 xalqaro konferensiyasi

International AIDS Conference har yili turli davlatlarda oʻtkazilib, AIDS 2026 Braziliyaning Rio-de-Janeyro shahrida 2026-yilning 26-31-avgust kunlari boʻlib oʻtadi. Konferensiyada onlayn yoki oflayn qatnashish mumkin. Dastur OIV boʻyicha oʻzining fikrlari, izlanishlari va konferensiyaga oʻz hissasini qoʻsha oladigan nomzodlarni bir yerga toʻplash hamda ularning ishtirokini moliyaviy qoplashni maqsad qilgan. Konferensiyada 18 yoshga toʻlgan, OIV/OITS boʻyicha ishlayotgan, oʻqiyotgan yoki volontyorlik faoliyati bilan shugʻullanayotgan nomzodlar qatnashishlari mumkin. Oflayn qatnashuvchilarning konferensiya vaqtidagi turar-joy, yoʻl va boshqa xarajatlari toʻliq qoplab beriladi.

Dasturga qabul jarayoni 2025-yil 20-noyabrdan 2026-yil 27-yanvar Oʻzbekiston vaqti bilan 28-yanvar soat 03:59 gacha davom etadi.

Dastur haqida ushbu havola orqali toʻliq maʼlumot olish mumkin.

Dastur ishtirokchilari quyidagi talablarga javob berishlari zarur:

• 2026-yil 26-iyulgacha 18 yoshga toʻlgan boʻlishlari kerak;
• OIV/OITS boʻyicha ishlayotgan, oʻqiyotgan yoki volontyorlik faoliyati bilan shugʻullanayotgan boʻlishlari lozim;
• Shuningdek, dastur doirasida media sohasi vakillari uchun ham alohida oʻrinlar ajratilgan boʻlib, unda quyidagi nomzodlar qatnashishlari mumkin:

1. Konferensiya mavzusiga yaqin faoliyat yurituvchi tashkilotlar, radio hamda media vakillari, jurnalistlar, rasmchi yoki videograflar;
2. OIV sohasida tadqiqot olib boruvchi tashkilot ommaviy nutq soʻzlovchi va namoyishchilari;
3. Ijtimoiy tarmoqlarda 50,000 dan ortiq obunachilarga ega, sohaga oʻz hissasini qoʻshgan blogerlar.

Media sohasi vakillariga qoʻyiladigan talablar haqida ushbu havola orqali batafsil maʼlumot olish mumkin.

Quyidagi ishtirokchilarga saralash jarayonida ustunlik beriladi:

• Maʼruzalari konferensiya uchun tanlab olingan tezis taqdimotchilari, seminar oʻtkazuvchilar va yordamchilari, hamda Global Village tashkilotchilari va yordamchi-tashkilotchilari;
• Daromadi past yoki oʻrta daromadli davlatlardan boʻlgan nomzodlar;
• OIV bilan yashayotgan nomzodlar;
• 35 yoshdan kichik, yosh va ish faoliyatini yangi boshlagan tadqiqotchilar;
• Ushbu konferensiyada avval qatnashmaganlar.

Konferensiyada oflayn ishtirok uchun saralab olingan nomzodlar quyidagi imkoniyatlarni qoʻlga kiritishadi:

• Safar xarajatlari qoplanadi;
• Konferensiya davomida kunlik xarajatlar qoplanadi;
• Barcha konferensiya materiallari bilan taʼminlanadi;
• Konferensiya kichik sessiyalari, koʻrgazmali konferensiya tahlillarida qatnashish imkoni yaratiladi;
• Konferensiya kunlari turar-joy bilan taʼminlanadi;
• Konferensiyadan ikki yil oʻtgach, IAS bepul aʼzoligini qoʻlga kiritishadi.

Eslatma! Onlayn ishtirokchilar ham konferensiya vaqtidagi barcha konferensiya maʼruzalari, tahlillari, yozib olingan sessiyalar va elektron posterlar bilan taʼminlanadi.

Dasturda qatnashish uchun badal puli mavjud boʻlib, uni qatnashchilarga qulay va hamyonbop qilish maqsadida uni yuqori daromadli, oʻrtadan yuqori daromadli, kam oʻrtacha daromadli hamda kam daromadli davlatlar uchun alohida belgilangan. Shuningdek, ushbu badal puli oddiy qatnashchilar va 26 yoshdan oshmagan nomzodlar uchun turlicha belgilangan boʻlib, Oʻzbekistondan boʻlgan nomzodlar uchun quyidagi miqdorni tashkil etadi:

1. Oddiy qatnashchilar: oflayn-$590; onlayn- $465;
2. 26 yoshgacha nomzodlar: oflayn- $210, onlayn - $145.

Media sohasi vakillari konferensiyada mutlaqo bepul qatnashishlari mumkin.

Eslatma! Yuqoridagi badal puli 2026-yil 12-fevralgacha roʻyxatdan oʻtadiganlar uchun boʻlib, undan keyin ariza topshirganlar uchun badal puli biroz oʻzgaradi. Batafsil ushbu havola orqali maʼlumot olish mumkin.

Dasturda qatnashish jarayoni quyidagicha:

• Onlayn ariza shakli toʻldiriladi va unda nomzodlar oʻzlarining tashkiloti, ish joyi, OIV boʻyicha tajribasi, konferensiyada qatnashishdan maqsadi va ularning ishtirokidan qanday foydalar borligini yoritib berishlari lozim;
• Motivatsion xat ham yuborilishi va u ingliz tilida, nomzodning ishi va tajribasi bilan tanish inson tomonidan yozilishi lozim;
• Koʻpchilikning ona tili ingliz tili boʻlmagani uchun ariza shaklini yozishda onlayn soʻz yozilishini tekshiruvchi dasturlar va tarjimonlardan foydalanishga ruxsat beriladi, lekin sunʼiy intellekt yordamida yozilgan ishlar qabul qilinmaydi;
• Ariza shaklini toʻldirishda qatnashish shaklini (onlayn yoki oflayn) koʻrsatish lozim;
• Dasturga qabul jarayoni 2025-yil 20-noyabrdan 2026-yil 27-yanvar Oʻzbekiston vaqti bilan 28-yanvar soat 03:59 gacha davom etadi.

Motivatsion xatni yozish va rasmiylashtirish qoidalari bilan ushbu havola orqali batafsil tanishish mumkin.

Muhim sanalar:

2025-yil 20-noyabr: Ariza topshirish jarayoni boshlanadi;

2026-yil 27-yanvar: Ariza topshirish jarayoni yakunlanadi;

2026-yil fevral-mart: Arizalar koʻrib chiqiladi va nomzodlar saralanadi;

2026-yil aprel boshi: Natijalar eʼlon qilinadi.