Tokio Texnologiya Institutida magistratura va doktorantura darajasini to'liq moliyalashtirilgan holda o'qish uchun MEXT grant dasturi

The International Graduate Program (IGP) (A), Tokio Texnologiya Institutida ingliz tilida oʻqitiladigan, 15 ta fakultetni oʻz ichiga oluvchi 6 xil oʻquv dasturlaridan tashkil topgan. Dasturga magistratura va/yoki doktorantura darajalarida oʻqimoqchi boʻlgan xalqaro talaba va tadqiqotchilar hujjat topshirishi mumkin:

• Integrated Doctoral Education Program. Ushbu dastur orqali nomzod 3 yildan 5 yilgacha boʻlgan muddatda magistrlik va doktorlik darajasiga ega boʻlishi mumkin.
• Masterʼs Program. Ushbu dastur orqali nomzod 2 yil davomida faqat magistrlik darajasiga ega boʻlishi mumkin.

Ushbu dasturlarga ariza topshirgan yuqori akademik natijalarga ega boʻlgan talabalar Tokio Texnologiya Institutining tavsiyasi bilan Yaponiya Taʼlim, Madaniyat, Sport, Fan va Texnologiya Vazirligi (“MEXT”) stipendiyasiga ariza topshirishlari mumkin. MEXT grant dasturiga tavsiya etish uchun tanlab olingan nomzodlarga oliygohda oʻqishga qabul qilinganlik xatida xabar beriladi.

Grant yutib olgan talabalarning safar, oʻqish, roʻyxatdan oʻtish xarajatlari qoplab berilish bilan birga, oylik stipendiya ham taqdim etiladi.

• Nomzod Yaponiya bilan diplomatik munosabatlarga ega boʻlgan davlat fuqaroligiga ega boʻlishi kerak (Oʻzbekiston ham kiradi);
• Yaponiya taʼlimi yoki unga teng boʻlgan bakalavr va/yoki magistrlik darajasiga ega boʻlishi kerak;
• Nomzod Yaponiyada istiqomat qilmasligi kerak;
• 34 yoshdan kichkina bo'lishi kerak (2022-yil, 1-aprel holatiga ko'ra);
• Nomzod Tokio Texnologiya Institutida oʻqish talablariga mos kelishi va oliygoh tomonidan MEXT grant dasturiga tavsiya etilishi lozim;
• Taʼlim yoʻnalishi nomzodning avvalgi oʻqigan sohasiga mos kelishi va yoʻnalish boʻyicha tadqiqot qila olishi kerak;
• Ingliz yoki yapon tilini yaxshi bilishi lozim (sertifikat so'raladi);
• Yuqori akademik natijalarga ega boʻlishi kerak (GPA 2.30/3.0);
• 2024-yil sentyabr oyining oxirigacha Yaponiyaga talabalik vizasi bilan kelish imkoniga ega boʻlishi kerak;
• Ruhan va aqlan sogʻlom boʻlishi kerak;
• MEXT grantini yutib olgan nomzod boshqa moliyaviy koʻmak, grant dasturlariga hujjat topshira olmaydi.

MUHIM: Nomzod ariza topshirishdan avval International Graduate Program (A) dasturi haqida batafsil maʼlumot bilan maxsus yo'riqnomada tanishib chiqish lozim. Shuningdek, MEXT grant dasturi talablari, uni rad etilishiga olib keluvchi holatlar (10 ta) bilan batafsil ushbu havola o'qib chiqish so'raladi.

MEXT grant dasturi nomzodlarga quyidagi imtiyozlarni taqdim etadi:

• Yaponiyaga borib-kelish safari xarajatlari qoplanadi;
• Oʻqish toʻlovidan toʻliq ozod etiladi;
• Magistrlik darajasi uchun oylik stipendiya — 147000 yapon iyenasi (~$1054);
• Doktorlik darajasi uchun oylik stipendiya — 148000 yapon iyenasi (~$1061);
• Universitetga ariza topshirish va roʻyxatdan oʻtish toʻlovlaridan ozod etiladi.

1. Nomzod dasturga hujjat topshirish uchun talablarga toʻliq mos ekanligini tekshirib koʻrishi lozim. Buning uchun Admission Division (qabul boʻlimi) ga elektron pochta manzili orqali murojaat qilishi mumkin.
2. Tokio Texnologiya Institutida nomzod oʻzi tanlagan yoʻnalish fakultetidan boʻlgan professor bilan bogʻlanib ilmiy rahbarlik qilishini soʻrashi va rozilik xatini olishi lozim. (CV, akademik transkript va boshqa hujjatlar soʻralishi mumkin).
3. Ilmiy rahbarlik qiluvchi professordan olingan rozilik xati Admissions Division (qabul boʻlimi)ga elektron pochta manzili  orqali yuborilishi kerak. Soʻng, nomzodga dasturga onlayn ariza topshirish uchun maxsus havola va parol taqdim etiladi.
4. Talab etilgan hujjatlar taqdim etiladi.
5. Dastur talablariga mos boʻlgan akademik jihatdan eng iqtidorli talabalar Tokio Texnologiya Instituti tomonidan MEXT grant dasturiga tavsiya etiladi.
6. MEXT grant dasturi uchun qoʻshimcha hujjatlar taqdim etiladi.
7. MEXT tomonidan yakuniy qaror qabul qilinadi.

Talab etiladigan hujjatlar:

• Ilmiy rahbarlik qiluvchi professorning rozilik xati;
• Tanlangan soha va oʻquv rejasi (namuna);
• Tadqiqot bayonoti;
• Til sertifikati (ingliz yoki yapon tili);
• Shaxsni tasdiqlovchi hujjat nusxasi;
• Tavsiyanoma (namuna);
• Akademik baholar qaydnomasi (transkript);
• Ariza toʻlovi amalga oshirilganligini tasdiqlovchi hujjat;
• Nomzodning avval oʻqigan dastur va darajasi (bakalavr va/yoki magistratura) Yaponiya taʼlim darajalariga mos kelishini tekshirish uchun (ariza shakli).

Muhim: Tanlangan dastur va yoʻnalishga qarab talab etiladigan hujjatlar oʻzgarishi mumkin.

Magistratura va doktorantura dasturlari haqida batafsil maʼlumot bilan ushbu havola orqali tanishib chiqish mumkin.

Stipendiya olish uchun ariza IGP(A) uchun kerakli hujjatlarni topshirish vaqtida onlayn, birga topshirilishi lozim. O'qishga qabul qilingan talabalar qo'shimcha intervyu yoki imtihon topshirishi mumkin. Arizasi muvaffaqiyatli o'tganlar bilan tezlikda bog'laniladi va arizaning original varianti nomzodning qo'l imzosi bilan taqdim etilishi so'raladi. 

Murojaatlar uchun: ryugakusei@jim.titech.ac.jp 

Tez-tez so'raladigan savollarga javoblar bilan bu yerda tanishish mumkin.

Ilmiy rahbarning rozilik xatini taqdim etish oxirgi muddati: 2022-yil 1-dekabr 19:59.

Natijalar e'lon qilinish sanasi: 2023-yil 6-mart 11:00.