Toshkent shahar hokimligi tomonidan oʻrta va oliy maʼlumotli yoshlar uchun pazandachilik va mehmonxona boshqaruvi boʻyicha Fransiyaning nufuzli Le Cordon Bleu maktabida bepul oʻqish imkoniyati. Barcha xarajatlar toʻliq moliyalashtiriladi

Milliy taomlar xorijlik sayyohlar uchun Oʻzbekistonni sayohat uchun manzil sifatida tanlashda hal qiluvchi omillardan biriga aylanib bormoqda. Biroq, koʻpgina umumiy ovqatlanish korxonalarining darajasini milliy taomlarning bezatish / tortish uslubi, haqiqiy Yevropa oshxonasining taomlarini original retseptlar asosida tayyorlash va xizmat koʻrsatish darajasi nuqtai nazaridan juda yaxshi deb boʻlmaydi. Shu bilan birga, Oʻzbekistonda jahon standartlari darajasidagi pazandachilik va mehmonxona boshqaruviga oid maktablar yoʻq. Shu munosabat bilan mehmonxona va restoran biznesi sohasi faoliyatini eng talabchan sayyohlarni qoniqtiradigan yuqori saviyada tashkil eta oladigan yuqori saviyali mutaxassislarga ehtiyoj sezilmoqda.

Toshkent shahar hokimligi iqtidorli yosh mutaxassislarni tanlash va ularni xalqaro tan olingan Le Cordon Bleu (Parij, Fransiya) maktabida oʻqitishni moliyalashtirish uchun 2021-yil dekabrda tanlov eʼlon qilgan. Ingliz yoki fransuz tillarini bilgan saralangan yosh mutaxassislar jahon standartlari darajasidagi pazandachilik hamda restoran va mehmonxona boshqaruvi koʻnikmalariga ega boʻladilar.

Dasturga qabul qilingan ishtirokchilarning taʼlim dasturi toʻlovlari, xalqaro aviaparvoz chiptalari, oʻqish davrida turar joy va ovqatlanish xarajatlari toʻliq moliyalashtiriladi.

Murojaat uchun telefon: +998971202552

Dasturda ishtirok etish uchun nomzodlar quyidagi talablarga javob berishi lozim:

• Nomzodlarning yoshi 20 dan katta va 40 yoshdan oshmasligi kerak;
• Tilni bilish – ingliz tilini (minimal IELTS 5,5 darajasida) yoki fransuz (B2 darajasida). Rasmiy sertifikat talab etilmaydi;
• Oliy maʼlumotli nomzodlar tajribaga ega boʻlishi maqsadga muvofiq, ammo majburiy emas. Oʻrta maʼlumotli nomzodlar taʼlim olishi koʻzda tutilayotgan dasturi yoʻnalishida mehnat tajribasi kamida 3 yil boʻlishi lozim;
• Magistraturaga hujjat topshirayotgan nomzodlar istalgan yoʻnalish boʻyicha oliy maʼlumotga ega boʻlishi kerak. 3-9 oylik dasturlarga hujjat topshirayotgan nomzodlar toʻliq oʻrta maʼlumotga ega boʻlishlari kifoya qiladi (ammo oliy maʼlumotga ega nomzodlar ustunlikka ega boʻladilar);
• Fuqarolik va yashash joyi – nomzodlar Oʻzbekiston fuqarosi boʻlishi hamda ariza topshirish vaqtida Toshkent shahrida yashashi va ishlashi kerak. Roʻyxatdan oʻtgan boʻlishi shart emas.

Dastur talablari haqida batafsil ushbu havola orqali maʼlumot olish mumkin.

Dasturga qabul qilingan nomzodlar quyidagi imtiyozlarga ega boʻladi:

• Taʼlim dasturi toʻlovlari qoplab beriladi;
• Xalqaro aviachipta xarajatlari moliyalashtiriladi;
• Bepul turar joy va oziq-ovqat bilan ta'minlanadi.

Dasturda ishtirok etish uchun nomzodlar yanvar oyi oxirigacha hokimiyat.grant@gmail.com elektron pochta manziliga yoki @Hokimiyat_grant_bot telegram botiga soʻrovnoma yuborish lozim.

Toshkent shahar hokimligi muzokaralar olib borgan va hamkorlik shartnomasini tuzgan Le Cordon Bleu fransuz maktabi dunyodagi eng yaxshi maktablar qatoridan joy olgan. Unda oʻzbek mutaxassislarining tayyorlanishi nafaqat Toshkentda, balki butun Oʻzbekistonda mehmondoʻstlik sohasiga ulkan ijobiy taʼsir koʻrsatishi mumkin.

Dastur haqida batafsil ushbu havola orqali maʼlumot olish mumkin.

Murojaat uchun telefon: +998971202552