Turkiyada xarajatlari qoplanadigan Xalqaro yosh volontyorlar lageri — ICYF International Young Volunteers Camp 2024
-
25/02/2024 Qabul boshlanishi
-
Toʻliq Moliyalash turi
-
Turkiya Davlat
-
24.03.2024 Oxirgi muddat
Umumiy maʻlumotlar
Islom hamkorlik yoshlar forumi Turkiya Respublikasi Yoshlar va sport vazirligi bilan hamkorlikda hozirda davom etayotgan gumanitar falokatlar haqida xabardorlikni oshirish, ushbu muammolarga samarali javob berish va tiklanish jarayoniga faol hissa qoʻshish maqsadidagi yoshlar uchun Xalqaro yosh volontyorlar lagerini tashkil qilmoqda.
Dastur 2024-yil 23-apreldan 5-maygacha Turkiya Respublikasining Antaliya shahrida boʻlib oʻtadi:
- Erkaklar uchun — 23-28 aprel kunlari;
- Ayollar uchun — 30-apreldan 5-maygacha.
Dastur quyidagi aniq maqsadlarga erishishni rejalashtirgan:
- Yosh volontyorlarning gumanitar falokat va tabiiy ofatlardan xabardorligini oshirish;
- Favqulodda vaziyatlar va ofatlarga qarshi zaruriy tayyorgarlik koʻrish va kerakli javob berish koʻnikmalari hosil qilish;
- Tabiiy ofatlarni boshqarish va falokatdan keyingi tiklanish uchun interfaol texnika hamda taʼlim usullaridan foydalangan holda bilim va koʻnikmalarini oshirish;
- Volontyorlik orqali yoshlarni global tinchlik va barqaror taraqqiyotga jalb qilish;
- Turli xalqaro tashkilotlar bilan hamkorlikda interfaol treninglar va amaliy seminarlar oʻtkazish orqali yosh volontyorlarning salohiyatini oshirish;
- Tabiiy ofatlarni tiklash bosqichida mutaxassislar rahbarligida psixologik va ijtimoiy yordam koʻrsatish koʻnikmalarini rivojlantirish.
Maʼlumot uchun: Volontyorlik yoshlarning jamiyatga ijobiy taʼsir koʻrsatish boʻyicha samarali amaliy harakatlaridan biridir. Gumanitar falokat esa tabiiy ofatlar, inson omili sabab boʻlgan falokatlar yoki murakkab favqulodda vaziyatlar boʻlishi mumkin. Bunday holatlar odamlarning katta guruhiga oziq-ovqat, toza suv yoki xavfsiz boshpana kabi asosiy ehtiyojlaridan foydalanishga toʻsqinlik qiladigan bir necha omillar yoki hodisalar natijasida yuzaga keladi.
Dastur haqida batafsil ushbu havola orqali maʼlumot olish mumkin.
Maqbullik shartlari
- 18 yoshdan 35 yoshgacha boʻlgan Islom hamkorlik tashkilotiga aʼzo davlat fuqarolari yoki ushbu tashkilotga aʼzo boʻlmagan davlatdagi musulmonlar qatnashishi mumkin;
- Ingliz tilini bilish lozim (sertifikat soʻralmaydi);
- Nomzodlar tabiiy ofatlar va gumanitar falokatlar sabab yuzaga kelgan mahalliy va global muammolarini tushunishi lozim;
- Volontyorlik tajribasi va yetakchilik qobiliyatiga ega boʻlish kerak;
- Jamoa bilan ishlash qobiliyati talab qilinadi;
- Lagerdagi oʻquv dasturida toʻliq qatnashish uchun masʼuliyatli boʻlish lozim.
Eslatma: Tanlov komissiyasi arizalarni muvofiqlik talablari asosida baholaydi. Agar komissiya qoʻshimcha maʼlumot olishni xohlasa, tanlovning oxirgi bosqichi sifatida onlayn suhbat qilishi mumkin.
Foydali tomonlari
- Dasturda bepul ishtirok etish mumkin;
- Turkiyada istiqomat qilayotgan ishtirokchilar uchun ichki transport xarajatlari qoplanadi (maksimal 2500 turk lirasigacha);
- Dasturda toʻliq qatnashgan ishtirokchilarga sertifikat beriladi;
- Turarjoy va oziq-ovqat bilan taʼminlanadi;
- Mahalliy transport xarajatlari qoplanadi (Antaliya aeroporti/Antaliya avtovokzalidan lager hududigacha va lager hududidan Antaliya aeroporti/Antaliya avtovokzaligacha);
- Tashkilotchilar viza arizasi uchun zarur boʻladigan nomzodning dasturda ishtirok etishini tasdiqlovchi xat taqdim etadi. Biroq ishtirokchilar viza xarajatlarini oʻzlari qoplashi kerak.
Eslatma: xalqaro safar xarajatlari to’liq qoplab berilmaydi, ammo tashkilotchilar $125 gacha mablag’ ajratishi mumkin.
Qoʻshimcha maʻlumotlar
- Natijalar faqat saralangan nomzodlarga elektron pochta orqali yuboriladi;
- Oxirgi muddat: 24-mart, 2024-yil;
- Email: volunteer@icyforum.org.