Universitet bitiruvchilari uchun Dubayda toʻliq moliyalashtiriladigan biznes sohasi boʻyicha oʻquv dasturi — Dubai Business Associates(DBA) Program

Dubai Business Associates(DBA) Program - iqtidorli va ​​intiluvchan universitet bitiruvchilariga Dubayda xalqaro biznes sohasi boʻyicha oʻqish va oʻzlarining biznes faoliyatini olib borish imkoniyatini taklif etuvchi oʻquv dasturi. Dastur turli mamlakat va millatlardan boʻlgan yoshlarni biznes sohasidagi yetakchi mutaxassislar sifatida tayyorlashni maqsad qilgan.

Dastur 9 oy davom etadi hamda akademik oʻquv modullari va 2 ta amaliy mashgʻulotlarini oʻz ichiga oladi. Akademik modullar biznes olamida muvaffaqiyatga erishish uchun zarur boʻlgan koʻnikmalar va vositalar toʻplamini taqdim etadi, shu bilan birga amaliy mashgʻulotlar ishtirokchilarga yirik biznes markazlaridan biri Dubay shahrida ishlash muhiti qanday ekanligi haqida kengroq tushunchaga ega boʻlishida yordam beradi. Dastur oʻquv fanlari va davomiyligi haqida batafsil “timeline” boʻlimi orqali tanishib chiqish mumkin.

Dastur davomida ishtirokchilar:

• Sanoat rahbarlari va bosh direktorlar bilan mahorat darslari;
• Malaka oshirish boʻyicha treninglar;
• Madaniy tadbirlar va ekskursiyalarda qatnashadilar. Shuningdek, ishtirokchilar uchun kasbiy va hayot murabbiylari tayinlanadi(a career coach and a life coach).

Qabul qilinadigan ishtirokchilar soni har yili oʻzgarib turadi lekin 40 kishidan oshmaydi.

Dastur haqida batafsil maʼlumot bilan rasmiy sayt orqali tanishib chiqish mumkin.

Nomzodlarga qoʻyiladigan talablar:

• Dasturda istalgan millat vakili ishtirok etishi mumkin;
• Kamida bakalavr darajasiga ega boʻlishi lozim;
• 0-3 yilgacha bo'lgan ish tajribasi bo'lishi tavsiya etiladi. (Ish tajriba shart emas!);
• Nomzodlar istalgan taʼlim yoʻnalishida tahsil olgan boʻlishi mumkin; biznes yoʻnalishida oʻqigan boʻlishi shart emas;
• Yozma va ogʻzaki ingliz tilini yaxshi bilishi talab etiladi (qoʻshimcha boshqa tilni bilish yanada ma'qul);
• Nomzodlar xalqaro va Dubay biznes sohasiga kuchli qiziqishini koʻrsata olishi lozim;
• Qiziquvchanlik va izlanuvchanlik dasturning asosiy talablaridan biri.

Dastur talablari bilan batafsil FAQs boʻlimi orqali tanishib chiqish mumkin.

Dastur toʻliq moliyalashtiriladi:

• Dubayga borish va qaytish aviachipta xarajatlari;
• Yuqori standartdagi mehmonxonadan turar joy;
• Tibbiy sugʻurta va yashash vizasi;
• Dastur davomida kundalik xarajatlar va baʼzi ichki sayohatlar uchun yetarli boʻlgan oylik stipendiya.

Dasturning imtiyozli jihatlari haqida batafsil FAQs boʻlimi orqali maʼlumot olish mumkin.

Rasmiy sayt orqali onlayn ariza toʻldiriladi. Ariza quyidagi boʻlimlardan iborat:

• Shaxsiy maʼlumotlar;
• Taʼlimga oid maʼlumotlar;
• Qoʻshimcha maʼlumotlar.

Ayrim kerakli hujjatlar:

• Qiziqish xati(cover letter);
• CV;
• Video biografiya.

Saralangan nomzodlar birinchi intervyuga taklif etiladi (onlayn). Birinchi intervyudan muvaffaqiyatli oʻtgan nomzodlar yakuniy intervyuga taklif etiladi (onlayn yoki oflayn).

Dasturga 2 turdagi qabul orqali hujjat topshirish mumkin: 

• 2025-yil 1-noyabrdan 15-yanvargacha (vaqtli qabul);

• 2026-yil 1-fevraldan 1-martgacha (odatiy qabul). 

Ayni paytda erta qabulga, ya’ni 2026-yil 15-yanvargacha hujjatlar qabuli davom etmoqda. 

Kerakli hujjatlar, tanlov jarayoni haqida batafsil maʼlumot bilan FAQs boʻlimi orqali tanishib chiqish mumkin.

Bogʻlanish uchun aloqa maʼlumotlari ushbu havola orqali rasmiy saytdan olinishi mumkin.

Tez-tez soʻraladigan savollar boʻlimi — FAQs.