Volontyorlar uchun Toshkentda xarajatlari qoplanadigan Eko-avlod oʻquv oromgohi

Yoshlar ishlari agentligi, Ijtimoiy himoya Milliy agentligi hamda Oʻzbekiston volontyorlari assotsiatsiyasi hamkorligida yurtimiz volontyorlari uchun Eko-avlod anʼanaviy oʻquv oromgohining 3-mavsumi tashkil etiladi.

Dasturdan asosiy maqsad yoshlar orasida ekologik madaniyatni oshirish, aholining ekologiya bilan bogʻliq huquq va manfaatlarini himoya qilish, ularning ilmiy va innovatsion qobiliyatlarini namoyon etish, ekologik muammolar va ularning yechimlariga bagʻishlangan takliflar ishlab chiqishdir.

Yozgi oromgoh Toshkent viloyati Boʻstonliq tumanida joylashgan “Yoshlar oromgohi”da oʻtkazilishi rejalashtirilgan.

Dastur haqida batafsil ushbu havola orqali maʼlumot olish mumkin.

• 16 yoshdan oshgan volontyorlik guruhi, maktabi, markazi, universiteti, klubi koordinatorlari hamda faol volontyorlar qatnashishi mumkin;
• Yil davomida hududda faollik koʻrsatish lozim;
• Dasturda toʻliq qatnashish shart;
• Oʻzbek, qoraqalpoq yoki rus tillarida erkin muloqot qilish lozim (qoʻshimcha tillarni erkin bilganlarga ustunlik beriladi).

• Dasturda bepul qatnashish mumkin;
• Yoʻl xarajatlari (Toshkent shahrida oromgohgacha) qoplanadi;
• Turar joy va ovqatlanish bilan taʼminlanadi.

Dasturga qiziqqanlar ushbu havola orqali ariza topshirishlari mumkin.

Hujjat topshirishda quyidagilar soʻraladi:

• Shaxsiy maʼlumotlar;
• Aloqa maʼlumotlari;
• Yashash joyi haqida maʼlumotlar;
• Nomzodning kulib tushgan rasmi;
• Kasbi;
• Pasport maʼlumotlari;
• Nomzodni tanlashdan sabab (kamida 150 belgi);
• Talabgorning volontyorlik yoʻlidagi yutuqlari;
• Ishtirokchining faoliyatini tasdiqlovchi 2 ta havola;
• Volontyorlik yoʻlidagi bir yillik reja (doc, docx, pdf, ppt, pptx fayl);
• Nomzodning stressbardoshliligi va liderlik qobiliyati;
• Kuchli lider boʻlish uchun nima kerakligi hamda respublika va dunyo miqyosida namunali volontyor haqida ishtirokchining fikri;
• Til bilish koʻnikmalari.

Muhim: Nomzodlar volontyor.uz saytidan roʻyxatdan oʻtgan boʻlishi kerak.

• Dasturga hujjat topshirish uchun oxirgi muddat: 10-mart 2026-yil.