WHO Internship — Shveysariyada tibbiyot sohasida to’liq moliyalashtiriladigan amaliyot dasturi

Jahon sogʻliqni saqlash tashkiloti (WHO) oʻzining Shveytsariyaning Jeneva shahridagi bosh qarorgohida Epidemiyalar va pandemiyalarni boshqarish departamenti (EPM) qoshidagi Medical Countermeasures boʻlimida 24 haftalik amaliyot oʻtash dasturiga arizalar qabul qilmoqda. Dasturning asosiy maqsadi global darajada yuqumli kasalliklarning oldini olish, vaksinalar, diagnostika va davolash choralarini adolatli taqsimlash tizimlarini takomillashtirishga hissa qoʻshishdir.

Amaliyot davomida tanlangan nomzodlar quyidagi vazifalarni bajaradilar:

• Tibbiy vositalar va yangi texnologiyalar boʻyicha ilmiy adabiyotlarni tahlil qilish hamda xaritalash;

• Epidemiya va pandemiyaga tayyorgarlik koʻrish boʻyicha maʼlumotlarni yigʻish, tizimlashtirish va tahlil qilish;

• Uchrashuvlar, seminarlar va konferensiyalar (ICG, BioHub, i-MCM-net) uchun qoʻllanmalar, hisobotlar, broshyuralar va taqdimot materiallarini tayyorlash hamda tahrirlash;

• Tashkiliy ishlarda, xususan, tadbirlarni tashkil etish va boshqarishda koʻmaklashish;

• Vaksinalar, diagnostika vositalari va terapevtik usullarga oid joriy loyihalarda bevosita ishtirok etish.

Dastur yakunida ishtirokchilar global sogʻliqni saqlash tizimining ishlash mexanizmlari, shtab-kvartira va mintaqaviy ofislar oʻrtasidagi hamkorlik hamda yuqumli kasalliklarga qarshi choralarni rejalashtirish boʻyicha amaliy koʻnikmalarga ega boʻladilar.

• Dunyodagi barcha davlatlar, jumladan Oʻzbekiston fuqarolari ham ariza topshira oladilar;

• Ariza topshirish vaqtida oliy taʼlim muassasasida kamida 3-kurs bakalavr bosqichini tamomlagan boʻlish yoki oʻqishni bitirganiga 18 oydan oshmagan boʻlish lozim;

• Taʼlim yoʻnalishi tibbiyot, biologiya, bioinformatika, mikrobiologiya, virusologiya, biokimyo, tibbiyot fanlari, axborot fanlari, statistika, jamoat salomatligi yoki turdosh sohalarda boʻlishi kerak;

• Ingliz tilini mukammal darajada bilish talab etiladi (fransuz tili yoki BMTning boshqa rasmiy tillarini bilish afzallik beradi);

• Kompyuter dasturlari (Word, Excel, PowerPoint) bilan ishlash tajribasiga ega boʻlish (R yoki XLStat kabi statistik dasturlarni bilish afzallik hisoblanadi);

• Tadqiqot olib borish, hisobotlar yozish va statistik tahlil qilish koʻnikmalariga ega boʻlish lozim.

• Amaliyotchilar uchun yashash xarajatlarini qoplash maqsadida oylik stipendiya (doimiy yashash joyi Jenevadan tashqarida boʻlganlar uchun maksimal 1 680 CHFgacha) beriladi;

• Har bir ish kuni uchun 20 CHF miqdoridagi tushlik vaucherlari taqdim etiladi;

• WHO tomonidan barcha amaliyotchilar bepul baxtsiz hodisalar va tibbiy sugʻurta bilan taʼminlanadi;

• Global miqyosdagi nufuzli tashkilotda ishlash, xalqaro mutaxassislar bilan professional aloqalar (networking) oʻrnatish va amaliy tajriba orttirish imkoniyati taqdim etiladi;

• Oʻquv va ilmiy koʻnikmalarni oshirish uchun eng yaxshi sharoitlar yaratiladi.

Dasturda ishtirok etish uchun hujjat topshirish quyidagi bosqichlardan iborat:

1. WHO rasmiy karyera portali orqali roʻyxatdan oʻting va onlayn ariza shaklini toʻldiring;

2. Ariza doirasida shaxsiy maʼlumotlar, taʼlim va ish tajribangiz haqidagi maʼlumotlarni yuklang;

3. Dastur talablariga muvofiq barcha savollarga javob berib, arizangizni yakuniy muddatgacha yuboring;

4. Saralangan nomzodlar bilan suhbat va kerakli hujjatlarni tekshirish jarayoni oʻtkaziladi.

Eslatma: Saralab olingan nomzodlardan oʻqish joyidan maʼlumotnoma (proof of enrolment), WHO tibbiy komissiyasidan oʻtganlik haqidagi sertifikat va tavsiyanoma beruvchilarning aloqa maʼlumotlari talab qilinadi. Shuningdek, nomzodlar tashkilot tomonidan talab etiladigan tegishli vaksinalarni olgan boʻlishlari shart.

Muhim sanalar:

• Hujjat topshirishning soʻnggi muddati: 2026-yil 31-iyul kuni soat 23:59 ga qadar;

• Amaliyot davri: 2026-yil 5-oktabrdan 2027-yil 19-martgacha (jami 24 hafta).

Eslatma: WHO amaliyot dasturi juda raqobatbardosh boʻlib, har yili faqat oz sonli nomzodlar tanlab olinadi. Faqat saralangan nomzodlar bilan keyingi bosqichlar uchun aloqaga chiqiladi.