Yangi Zelandiyaning Waikato universitetida bakalavr va magistratura bosqichini istalgan sohada oʻqish imkonini beruvchi grant

The University of Waikato International Excellence Scholarship dasturi 2015-yilda tashkil etilgan. Ushbu dastur xalqaro munosabatlarni rivojlantirish va qobiliyatli xalqaro talabalarni qoʻllab-quvvatlash maqsadida tashkillashtirilgan boʻlib, nomzodlarga Yangi Zelandiyaning Waikato universitetida bakalavr va magistratura bosqichida oʻqish imkonini beradi. Grant uchun ajratilgan mablagʻ magistratura bosqichi talabalari uchun 15,000 dollar va bakalavr bosqichi talabalari uchun esa 10,000 dollar miqdorigacha boʻlib, moliyalashtirish miqdori talabalarning taʼlim yili va bosqichiga qarab farq qiladi. Grant tomonidan ajratilgan mablagʻ faqatgina kontrakt pulini toʻlab berish uchun foydalaniladi va uni boshqa maqsadda ishlatish mumkin emas. Muvaffaqiyatli talabalar universitetning xalqaro vakillariga ham aylanishlari mumkin.

Nomzodlar akademik koʻrsatkichlariga qarab saralab olinadi. Dasturga istalgan vaqtda ariza topshirish mumkin. Grantga ariza topshirish uchun dastavval Waikato universitetiga oʻqishga qabul qilinish va universitet talablaridan oʻtish lozim.

Dastur haqida ushbu havola orqali batafsil maʼlumot olish mumkin.

Tanlovda ishtirok etish uchun quyidagi talablar mavjud:

• Dasturga Waikato universitetiga birinchi marta hujjat topshirayotgan qobiliyatli nomzodlar qatnashishlari mumkin;
• Dasturga universitetda toʻliq taʼlim oluvchilar ishtirok etishlari kerak yaʼni onlayn oʻquvchilar grantni qoʻlga kirita olmaydilar;
• Nomzod Waikato universitetiga shartli yoki shartsiz ravishda qabul qilinganligi toʻgʻrisidagi maʼlumotnomaga ega boʻlishi lozim. Chunki grantga ariza topshirish davomida aynan mana shu hujjat soʻraladi;
• Ariza uchun topshiriladigan diplomining ballari GPA B+ dan past boʻlmasligi lozim. Chunki saralash bosqichi akademik koʻrsatkichlarga qarab amalga oshiriladi;
• Waikato universitetida avval roʻyxatdan oʻtmagan yoki oʻqimagan boʻlishi kerak;
• Grantga ariza topshirish davrida Waikato universitetida oʻqish kontrakt puli toʻlanmagan boʻlishi lozim;
• Waikato universitetiga biror tashkilot yoki davlat idorasi orqali oʻqishga kelmagan boʻlishi lozim;
• Waikato universitetiga almashinuv dasturi orqali oʻqishga kelgan talabalar ushbu grant dasturiga nomzodlik qila olmaydilar;
• Grantga ariza topshirishdan avval barcha nomzodlarga dastur shartlarini batafsil oʻqish va tanishib chiqish tavsiya etiladi.

Eslatma! Yuqoridagi talablarning barchasi grantga tegishli. Dasturda qatnashishdan avval nomzodlar Waikato universitetida oʻqish uchun ariza topshirishadi va universitet talablaridan oʻtishadi. Mana shu davr mobaynida universitet tomonidan ham tanlangan yoʻnalishga qarab turlicha hujjatlar va talablar soʻralishi yoki soʻralmasligi mumkin (masalan, til sertifikati).

Dastur talablari haqida ushbu havola orqali batafsil maʼlumot olish mumkin.

Dasturning quyidagi foydali tomonlari mavjud:

• Taqdim etiladigan stipendiya miqdori ma'lum bir shartlar asosida 2,500 dollardan 15,000 dollargacha bo'lishi mumkin;
• Magistratura bosqichi talabalariga 15,000 dollar, bakalavr talabalariga bo'lsa 10,000 dollargacha stipendiya beriladi;
• Dastur natijalari MyWaikato portali orqali eʼlon qilinadi;
• Muvaffaqiyatli nomzodlar 14 kunlik stipendiyani qoʻlga kiritishadi. Ammo stipendiya, ya'ni grant belgilangan vaqtda qabul qilinishi lozim, aks holda taklif o'z kuchini yo'qotadi;
• Grantga qabul qilinganligi toʻgʻrisidagi xat olingandan keyin nomzodlar bemalol talabalar vizasini qoʻlga kiritishlari mumkin boʻladi.

Eslatma! Grantni keyingi oʻquv yilida ham qoʻlga kiritish talabalarning akademik koʻrsatkichlariga bogʻliq boʻladi. Dastur nomzodlarni 3 yilgacha moliyalashtirishi mumkin.

Dasturning foydali tomonlari haqida ushbu havola orqali batafsil bilib olish mumkin.

Dasturda roʻyxatdan oʻtish jarayoni quyidagicha:

Dasturga istalgan vaqtda roʻyxatdan oʻtish mumkin. Arizalar odatda 8 haftadan 12 haftagacha boʻlgan muddatda koʻrib chiqiladi. Onlayn arizani toʻldirish mobaynida nomzodlar quyidagilarni yuklashlari kerak boʻladi:

• Waikato universitetida shartli yoki shartsiz ravishda oʻqishga ruxsat berilganligi toʻgʻrisidagi xat;
• 100 soʻzdan koʻp boʻlmagan Waikato universitetida oʻqishdan maqsadi va 100 soʻzdan koʻp boʻlmagan nomzodning Waikato universitetida xalqaro talaba sifatida oʻqishdan maqsadlari yoritilgan xat taqdim etish lozim.

Saralash bosqichi quyidagicha boʻladi:

• Dastavval arizalar nomzodning oʻrtacha diplom baliga qarab universitetning xalqaro mintaqaviy boʻlimi tomonidan saralab chiqiladi va tanlov komissiyasiga joʻnatiladi;
• Tanlov komissiyasi dastur qoʻmita raisi va xalqaro nomzodlar bilan shugʻullanish boʻyicha direktorni ham oʻz ichiga oladi;
• Tanlov komissiyasining qarorlari yakuniy boʻlib, komissiya qaroridan keyin unga hech qanday oʻzgartirish va qoʻshimchalar kiritib boʻlmaydi.

Eslatma! Grantni qoʻlga kiritish uchun nomzodlar dastavval Waikato universitetiga oʻzlari xohlagan yoʻnalishlariga ariza topshirib, uning imtihonlaridan oʻtishlari kerak boʻladi. Imtihonlardan muvaffaqiyatli oʻtgandan soʻng universitet oʻqishga shartli yoki shartsiz ruxsat berilganligi toʻgʻrisida xat joʻnatadi. Mana shu xatni qoʻlga kiritgandan keyin grant uchun bemalol ariza topshirish mumkin. Grant faqatgina Yangi Zelandiyaning Waikato universitetida oʻqish uchun ajratilgan boʻlib, boshqa universitetlarda amal qilmaydi.

Dasturga ariza topshirish jarayoni haqida ushbu havola orqali batafsil tanishib chiqish mumkin.

Tanlov komissiyasi istalgan vaqtda dasturga oʻzgartirish va qoʻshimchalar kiritish huquqiga ega. Tanlov natijalari eʼlon qilingandan keyin komissiya qarori qayta koʻrib chiqilmaydi va eʼtirozlar qabul qilinmaydi.

Xalqaro talaba sifatida dasturda ishtirok etayotganlar dastur davomida xalqaro talaba sifatida qolishlari lozim. Dastur ishtirokchilari universitet talablariga rioya etishlari va kerak boʻlganda grantni ifoda etuvchi uchrashuvlarda qatnashishlari lozim. Dastur davomida dastur talablarini buzishga toʻgʻri keluvchi holatlar boʻlgandan universitet elektron manziliga murojaat qilish soʻraladi.

Dastur haqida batafsil rasmiy pdf fayli maʼlumoti bilan ushbu havola orqali tanishish mumkin.

Maʼlumot uchun:

E-mail: scholarships@waikato.ac.nz;

international@waikato.ac.nz.

Tel: +64 7 838 4610

Dastur haqida quyidagi ijtimoiy tarmoqlardan ham maʼlumot olish mumkin:

-LinkedIn;

-Instagram;

-Facebook;

-Twitter;

-Tiktok;

-You tube;

-WeChat.