Yaponiyada 6 oy davomida toʻliq moliyalashtirilgan holda tadqiqot olib borish imkoniyati — MIF Research Fellowship Program 2026

Matsumae International Foundation(MIF) Research Fellowship Program 2026 - barcha mamlakatlardan PhD darajasiga ega, Yaponiyada tadqiqot olib borish istagida boʻlgan tadqiqotchilarni ragʻbatlantirish maqsadida 6 oy muddatda toʻliq moliyalashtiruvchi grant dasturi.

Grant asosan tabiiy fanlar, muhandislik va tibbiyot kabi tadqiqot sohalariga birinchi oʻrinda eʼtibor qaratadi. Dastur uchun jami 15 nafarga yaqin tadqiqotchilar tanlab olinadi.

Dastur 2026-yil aprel va 2027-yil mart oraligʻida 6 oy davom etadi. Berilgan 1 yil ichida nomzod oʻziga qulay boʻlgan 6 oylik muddatni tanlashi mumkin.

Nomzodlar ariza topshirishdan oldin qabul qiluvchi muassasadan qabul xatini olishi kerak boʻladi. Oʻz tadqiqotini amalga oshirish uchun Yaponiyadagi qabul qiluvchi muassasani (universitetlar, milliy tadqiqot institutlari yoki xususiy sektordagi shunga oʻxshash muassasalar) nomzodlarning oʻzlari erkin ravishda tanlashlari lozim. MIF nomzodlarga Yaponiyadagi qabul qiluvchi muassasalar boʻyicha maslahat yoki tavsiyalar bermaydi.

Dasturga qabul jarayoni hali ochilgani yoʻq, qabul jarayoni 2025-yil 1-iyundan 30-iyunga qadar davom etadi. 

Rasmiy eʼlon orqali dastur haqida batafsil maʼlumot bilan tanishib chiqish mumkin.

Dastur talablari:

• Nomzodlar ariza berishdan oldin Yaponiyadagi qabul qiluvchi muassasadan taklifnoma(qabul) xatini olishlari kerak;
• Nomzodlar PhD darajasiga ega bo‘lishi kerak (doktorlik darajasi);
• Ariza berish vaqtida 45 yosh yoki undan kichik bo'lishi kerak;
• Nomzodlar ingliz yoki yapon tillarini yetarli darajada bilishlari lozim;
• Nomzodlar avval Yaponiyada bo'lmagan va ariza berish vaqtida ham Yaponiyada bo'lmasligi kerak (qisqa muddatli sayohat tashrifi yoki konferensiyalar bundan mustasno);
• Nomzodlar o'z mamlakatlarida ishga ega bo'lishlari, dasturni tugatgandan so'ng u yerga qaytishlari va o'z mamlakatlari rivojiga hissa qo'shishlari kerak.

Dastur talablari bilan batafsil rasmiy e'lon orqali tanishib chiqish mumkin.

Dasturning imtiyozli jihatlari:

• Oylik stipendiya — JPY 220 000 (~$1542). Yaponiyada tadqiqot faoliyati (shu jumladan materiallar) va yashash xarajatlarini qoplash uchun beriladi;
• Yaponiyaga kelgandagi dastlabki xarajatlar — JPY 120 000 (~$841). Yaponiyada yashash uchun dastlabki xarajatlarning bir qismini qoplash uchun beriladi.
• Borish-kelish aviachiptalari. Ikki tomonlama ekonom klass aviachiptalari grant oluvchining yashash joyidan eng yaqin xalqaro aeroport va Tokio, Yaponiya oʻrtasida taqdim etiladi.
• Sugʻurta. Tibbiy davolanish va favqulodda holatlar uchun chet elga sayohat sugʻurtasi taqdim etiladi.
• Oʻquv safari. MIF dastur ishtirokchilariga Yaponiya haqidagi bilimlarini chuqurlashtirish uchun dastur davomida oʻquv safarida ishtirok etishga taklif qiladi.

Dastur imtiyozlari va imkoniyatlari bilan batafsil rasmiy eʼlon orqali tanishib chiqish mumkin.

Ariza berish uchun nomzodlar quyida koʻrsatilgan hujjatlarni application@mif-japan.org elektron pochta manziliga yuborishi lozim.

Talab etiladigan hujjatlar:

• Toʻldirilgan ariza shakli (PDF formatda. Word formatda yuklab olish mumkin).
• Tadqiqot rejasi. Ushbu maʼlumotlarni qamrab olishi lozim: a) tadqiqotning mazmuni, maqsadi va metodologiyasi; (b) tadqiqot loyihasining yoʻl xaritasi; (c) tadqiqot loyihasi nomzodning mamlakati uchun manfaati.
• Nashr etilgan adabiyot elektron nusxasi. Nomzoddan Yaponiyada oʻtkazmoqchi boʻlgan tadqiqot loyihasiga bogʻliq faqat bitta nashrni (PDF) yuborish talab etiladi.
• CV va chop etilgan adabiyotlar roʻyxati.
• Ish joyidan tavsiyanoma.
• Diplom nusxalari. PhD, magistratura, bakalavr darajalari diplomlari ingliz tilidagi tarjimasi bilan birga topshirilishi kerak (nomzodning oʻzi qilgan tarjimasi qabul qilinmaydi);
• Nomzodni Yaponiyada qabul qiladigan institut/professor nomidan taklif(qabul) xati.

Hujjatlarni joʻnatishda quyidagilarga eʼtibor berish kerak:

• Barcha hujjatlar PDF formatda boʻlishi kerak;
• Barcha hujjatlar ingliz tilida taqdim etilishi kerak;
• Toʻliq boʻlmagan hujjatlar qabul qilinmaydi;
• Ushbu holatlarda elektron ariza toʻgʻridan-toʻgʻri rad etiladi:
  • Xabar hajmi 10MBdan oshib ketganida;
  • PDF formatida boʻlmagan fayllar ilova qilinganida;
  • Har qanday hajmi kichiklashtirilgan fayllar ilova qilinganida(“zip” yoki “rar”);
  • Har qanday link yoki yuklab olinadigan dasturlarni oʻz ichiga olgan holatda.

Eslatma! Dasturga qabul jarayoni hali ochilgani yoʻq, qabul jarayoni 2025-yil 1-iyundan 30-iyunga qadar davom etadi. 

Rasmiy eʼlon orqali barcha kerakli hujjatlar va ariza berish yoʻl-yoʻriqlari bilan tanishib chiqish mumkin.

Savollar bilan rasmiy sayt orqali onlayn murojaat qilish mumkin.

Dastur haqida tez-tez soʻraladigan savollar boʻlimi — FAQs.