Yaponiyada bakalavr bosqichini to'liq grant va stipendiya asosida oʻqish imkonini beruvchi KAUS Scholarship dasturi

Yaponiyaning Kioto Oliy fanlar universiteti (KAUS)ning navbatdagi 2022/2023-oʻquv yili uchun qabul dasturi ochilmoqda. KAUS — nafaqat Yaponiya, balki dunyo miqyosida oliy muhandislik va texnika boʻyicha eng soʻnggi ilmlarni oʻzlashtirish, zamonaviy ilm-fan muhitida yangidan-yangi kashfiyotlar qilish imkonini beruvchi oliygoh hisoblanadi.

Universitet muhandislik fakultetiga (Engineering faculty) ariza topshirish niyatida boʻlgan eng iqtidorli talabalarni grant ajratish yoʻli bilan qoʻllab-quvvatlaydi. Yuz foiz grantga munosib deb topilgan nomzodlar 4 oʻquv yili davomida bepul oʻqish va stipendiya olish imtiyozini qoʻlga kiritadilar. Shuningdek, oʻqish pulini qisman qoplovchi grant ham mavjud. Abituriyentlarga qoʻyiladigan talablar esa, avvalo, fizika-matematika fanlarini puxta bilish va ingliz tilida erkin muloqot qila olishdir.

Talabalikka tavsiya etilganlarni haqiqiy ilm-fan muhiti kutib turadi. Oʻquv yilining oxirgi 2 yilida (3-4-kurslar) talabalar “Capstone Project” loyihasiga jalb etilib, texnologiya kompaniyalari tomonidan taqdim etilgan real hayotiy muammolarni hal qilish ustida ish olib boradilar. Shuningdek, elektromobillar, dronlar, robotlar, sunʼiy intellekt, mashinalar, dvigatellar muammosi bilan bogʻliq yechimlar, elektr energiyasini ishlab chiqarish tizimlari yuzasidan chuqur bilimlarni egallaydilar. Darslar xalqaro toifadagi professor-oʻqituvchilar tomonidan olib boriladi.

1. Nomzod Yaponiya yuqori maktabi tizimiga mos keladigan 12 yillik taʼlim tizimini tugatgan boʻlishi kerak (11 va undan kam yil oʻqiganlar uchun maxsus talablar mavjud).
2. Maktab davrida matematika (algebra, geometriya, statistika, hisob-kitob) va fizika fanlarini chuqur oʻzlashtirgan boʻlishi shart (agar nomzod maktab dasturidan tashqari bu fanlarni mustaqil oʻzlashtirgan boʻlsa, Qabul komissiyasiga xabar berishi kerak).
3. Ingliz tilini yetarli darajada bilishi lozim (IELTS min 5.5)

Talablar bilan batafsil bu yerda tanishish mumkin.

Grant ikki xil shaklda taqdim etilishi mumkin:

1. Super grant: toʻrt yillik oʻqish puli, kirish badali 100% toʻlab beriladi va stipendiya taqdim etiladi.
2. Anʼanaviy grant: toʻrt yillik oʻqish puli, kirish badali 100%, 50% yoki 30% gacha toʻlab beriladi, stipendiya taqdim etilmaydi.

Arizachilar quyidagi tartibda hujjat topshirishlari lozim:

1. Online ariza (ariza badali: 5,000 yen).
2. Pasport namunasidagi rasm (.jpeg formatda).
3. Kirish inshosi (300 ta soʻzdan 350 tagacha; oʻqishga topshirishdan maqsad, nomzodning qiziqishlari va kelajak maqsadlari haqida yozilsin).
4. Oxirgi 2 yillik oʻqish fanlari va baholarini qamrab olgan hujjat nusxasi ( ingliz tilidagi tasdiqlangan tarjimasi bilan).
5. Oʻqishni tamomlaganlik haqida hujjatning skaner nusxasi (ingliz tilida).
6. Standart yakuniy imtihon natijasining ingliz tilidagi nusxasi (imtihonlar roʻyxati bu yerda keltirilgan; agar nomzodning imtihon turi roʻyxatda keltirilmagan boʻlsa, ariza vaqtida buni qayd etishi kerak).
7. Ingliz tilini bilish darajasini tasdiqlovchi sertifikat (IELTS, TOEFL iBT, PTE, Duolingo. Minimal talablar bu yerda).
8. Tavsiyanoma xati (toʻgʻridan toʻgʻri tavsiyanoma beruvchi tomondan yuklanishi kerak).
9. Shaxsni tasdiqlovchi hujjatdan nusxa.
10. Yashash joyidan maʼlumotnoma (faqat Yaponiya fuqarolariga tegishli).

Muhim: Agar nomzodning oxirgi 6 yil ichida asosiy taʼlim tilisi ingliz tili boʻlgan boʻlsa, til bilim sertifikatini topshirishi shart emas, ammo qoʻshimcha tavsiyanoma xati talab qilinadi. IELTS sertifikatidan tashqari barcha sertifikat nusxasi imtihon topshirilgan test markazi orqali yuborilishi shart. Hujjatlarga qoʻyilgan talablar bilan batafsil bu yerda tanishing.

Ariza topshirish muddati yakunlangach, nomzodlardan qoʻshimcha hujjatlar soʻralishi mumkin (pochta orqali yopiq konvertda joʻnatiladi). Zarur deb topilsa, onlayn intervyuga ham taklif etilishlari mumkin. Erta qabul (31-oktabrda ariza topshirish muddati yakunlanadi) ning yakuniy natijalari 2021-yilning 27-dekabrda eʼlon qilinadi.

Grant yutib olish uchun alohida hujjatlar talab etilmaydi. Saralash mavjud hujjatlarga qoʻyilgan talablar asosida amalga oshiriladi. Grantga tavsiya etilgan nomzodlar oʻqishga qabul qilinganlik haqidagi xabar bilan bilan birga eʼlon qilinadi.

Iqtidorli talabalar uchun yotoqxona ajratiladi (1 yil davomida). Grant imtiyozlarini saqlab qolish uchun talabaning yaxshi oʻqishi va hammaga oʻrnak boʻla olishi shart. Universitet obroʻsiga putur yetkazuvchi yoki axloq normalariga zid harakatlar sodir etgan taqdirda, talaba grantdan mahrum qilinadi.

Qoʻshimcha maʼlumot va savollarga javobni:

• Tezkor savol-javob boʻlimidan;
• Ushbu sahifada keltirilgan onlayn ariza shaklini toʻldirish orqali olish mumkin.