Yaponiyaning birinchi raqamli universitetiga kimyo faniga oid yoʻnalishlardan biri bo'yicha grant asosida oʻqishni koʻchirib oʻtkazish imkoniyati

Yaponiyaning birinchi raqamli va eng qadimiy universitetlaridan biri, Tokioda joylashgan the University of Tokyo oliygohi oʻqishini koʻchirib oʻtkazmoqchi boʻlgan (transfer students), bakalavr bosqichida oʻqiyotgan xorijiy talabalar uchun Global Course of Science(GCS) grant dasturini taklif qiladi.

Dastur doirasida, talabalar Tokyo universitetining Global Course of Science fakultetidagi kimyo faniga oid yoʻnalishlardan biriga koʻchirib oʻtkazishi mumkin.

Dastur boshlanishiga qadar (2025-yil kuzgi semestr), akkreditatsiyadan oʻtgan istalgan universitetda, eng kamida 2 yil tahsil olgan talabalar, 3-kursdan boshlab oʻqishini koʻchirib oʻtkazishi mumkin.

Universitet taʼlim tili ingliz tilida va nomzodlardan yapon tilini bilish talab etilmaydi. Universitetni tamomlagandan soʻng, talabalarga Bachelor of Sciences(BSc) darajasi beriladi.

Grant dasturi haqida batafsil maʼlumot bilan ushbu havola orqali tanishib chiqish mumkin.

Grant dasturi talablari:

• Nomzodlar Yaponiyadan tashqarida kamida 6 yillik oʻrta (oʻrta va yuqori maktab) va kamida 2 yillik oʻrta maktabdan keyingi (universitet) taʼlim olgan boʻlishi kerak;
• Nomzodlar akkreditatsiyadan oʻtgan oliy taʼlim muassasasida (OTM) bakalavriatning dastlabki 2 yillik taʼlimini muvaffaqiyatli tugatgan/tugatadigan kunduzgi taʼlim talabasi boʻlishi kerak;
• Hujjat topshirishdan oldin kimyo fanidan bakalavriat darajasidagi asosiy darslarni va quyidagi fanlardan kamida 2 tasini tamomlagan boʻlishi kerak: matematika, fizika yoki biologiya.
• Nomzodlar ariza topshirishdan oldin UTokyo kredit tizimiga mos keladigan kamida 62 ta kreditni olishlari kerak (Maʼlumotnoma: 2 kredit UTokyoda 13 haftalik 105 daqiqalik maʼruzalardan iborat);
• Ingliz tilini yaxshi bilishlari kerak, chunki barcha darslar va laboratoriya mashgʻulotlari ingliz tilida olib boriladi:
  • Ushbu test natijalaridan biri taqdim etilishi lozim: TOEFL iBT — 80; TOEFL PBT — 550; IELTS Academic — 6.5 (ballar toʻgʻridan-toʻgʻri test muassasasidan GSC maʼmuriyatiga yuborilishi kerak).
  • Yoki ingliz tili nomzodning ona tili boʻlishi lozim.
  • Yoki oxirgi 8 yil davomida, oʻrta va oʻrta taʼlimdan keyingi taʼlim muassasalarida ingliz tili taʼlim tili boʻlgan.

Grant dasturi talablari va shartlari bilan batafsil ushbu havola orqali tanishib chiqish mumkin.

Dastur quyidagi imtiyozlarni taqdim etadi:

• “Faculty of Science Scholarship” — oyiga 150,000 yapon iyeni (~$950) miqdorida stipendiya (ketma-ket ikki yilgacha). Ushbu stipendiya universitetga kirish toʻlovi (~$1800) va yillik oʻqish toʻlovlarini (~$3400) toʻlash va kunlik xarajatlarni qoʻllab-quvvatlash uchun taqdim etiladi;
• Shuningdek, universitet GSC talabalari uchun toʻliq moliyalashtiriladigan oylik ijara bilan uy-joy taqdim qiladi (ketma-ket ikki yilgacha). Kommunal xizmatlar va internet kabi boshqa toʻlovlarni toʻlash talabaning zimmasida boʻladi;
• Yaponiyaga yetib kelguniga qadar, har bir GSC talabasiga student tutor biriktiriladi. Ular talabalarga Tokiodagi yangi hayotida yordam beradi, masalan, turar joyni roʻyxatdan oʻtkazish va bank hisobini ochishda yordam beradi;
• GSC boshlangʻich darajadagi yapon tili kursi taklif etiladi. Ushbu kursga qoʻshimcha ravishda universitetda turli darajadagi yapon tili darslari taklif etiladi.

Eslatma: GSCga ariza topshirish uchun avvaldan yapon tilini bilish talab etilmasa ham, talabalarga Yaponiyada boʻlgan vaqtda yapon tilini oʻrganish boʻyicha keng imkoniyatlardan foydalanish tavsiya etiladi.

Dastur taqdim etadigan imtiyozlar bilan ushbu havola orqali batafsil tanishib chiqish mumkin.

1. Rasmiy saytda onlayn ariza toʻldirilishi kerak. Arizada quyidagi maʼlumotlar taqdim etilishi lozim:

1. Nomzodning shaxsiy maʼlumotlari.
2. Nomzodning avvalgi taʼlimiga oid maʼlumotlar. Tahsil olgan barcha oʻrta (7-sinfdan 11-sinfgacha boʻlgan) va oʻrta taʼlimdan keyingi (kamida 2 yillik universitet) taʼlim muassasalarini roʻyxati talab etiladi.
3. Ingliz tili sertifikatlari (IELTS, TOEFL).
4. Shaxsiy bayonot (ingliz tilida; maksimum 1000 ta soʻz) Bayonot nomzodning oʻz fikrini rivojlantirish va yetkazish qobiliyatini koʻrsatishi muhimdir.
5. Qoʻshimcha maʼlumotlar. Har qanday muhim akademik yutuqlar yoki mukofotlar/stipendiyalar, shuningdek, darsdan tashqari mashgʻulotlar (masalan, amaliyot, volontyorlik) roʻyxatini kiritish tavsiya etiladi. (har biri uchun maksimum 500 ta soʻz)
6. Tavsiyanoma (2 ta). Toʻgʻridan-toʻgʻri tavsiya beruvchi shaxslardan qabul qilinishi tufayli bogʻlanish uchun ularning aloqa maʼlumotlari koʻrsatilishi lozim (universitetning rasmiy elektron pochta manzili taqdim etilishi kerak).

Shaxsiy bayonotda quyidagi maʼlumotlar boʻlishi talab qilinadi:

• Tokio universitetidagi Global Science Course dasturiga hujjat topshirishni xohlayotganingiz sababini izohlang;
• Sizning intellektual oʻsishingizga taʼsir qilgan, bakalavriat bosqichida duch kelgan har qanday akademik tajriba yoki qiyinchiliklarni, ularni qanday yengib oʻtganingiz va/yoki oʻrgangan saboqlaringizni tavsiflang va muhokama qiling;
• Kimyo fanini mutaxassislik sifatida oʻqishga boʻlgan qiziqishingiz va oʻz oldingizga qanday akademik va kelajakdagi maqsadlarni qoʻyganligingiz.

2. Kerakli hujjatlar:

• Oʻrta taʼlim maktabi baholari;
• Maktab attestati;
• Universitet baholari;
• Talabaning universitetda oʻqishi toʻgʻrisidagi maʼlumotnoma;
• Universitetda oʻqigan fanlari haqidagi maʼlumot (syllabus);
• Pasport/shaxsni tasdiqlovchi ID karta nusxasi;
• Ariza toʻlovini amalga oshirilganligini tasdiqlovchi chek(~$90).

Muhim: Ingliz tilida boʻlmagan hujjatlar, tasdiqlangan tarjimasi bilan birga taqdim etilishi kerak. Hozirda arizalar qabul qilinmayapti, arizalar qabul qilish uchun sayt 2025-yil 21-yanvardan ochiladi. 

Dasturga hujjat topshirish jarayoni haqida batafsil rasmiy sayt orqali maʼlumot olish mumkin.

Tez-tez soʻraladigan savollar boʻlimi — FAQs.

Qoʻshimcha savollar bilan rasmiy saytda contact form orqali murojaat qilish mumkin.