Yosh arxitektor va shaharsozlik mutaxassislari uchun Smart Rural Planning tanlovi

Oʻzbekiston Respublikasi Iqtisodiyot va moliya vazirligi Birlashgan Millatlar Tashkilotining Taraqqiyot dasturi va Islom Taraqqiyot Banki bilan hamkorlikda yosh arxitektorlar va shaharsozlik mutaxassislari uchun shaharsozlik hujjatlarini takomillashtirish va innovatsion, kam uglerodli dizayn yechimlarini joriy etishga qaratilgan “Smart Rural Planning” tanlovini taqdim qiladi. Tanlov hududlar, shaharlar va qishloqlarni ijtimoiy-iqtisodiy rivojlantirish loyihalarni ishlab chiqish va amalga oshirishda yoshlarni faol ishtirok etishga keng jalb etish maqsadida tashkil etilmoqda. 

Tanlov 3 ta nominatsiya boʻyicha oʻtkaziladi:

• Smart rural settlement — qishloq hududining bosh rejasi (master-plan) yoki konseptual dizayni;
• Smart district — shahar yoki tumanning konseptual loyihasi, bosh reja (master-plan);
• Green building — jamoat binosi yoki ijtimoiy obyektning loyihasi.

Tanlov maqsadlari:

• Yangi dizayn va muhandislik gʻoyalarini izlash, bosh rejalarning jamoatchilik muhokamasini faollashtirish va ularning jamiyatdagi oʻrnini oshirish;
• Yosh arxitektorlarga oʻz salohiyatini namoyon etish va tajriba orttirish imkoniyati;
• Arxitektura-qurilish fakultetlari bitiruvchilari tomonidan ishlab chiqilgan diplom ishlarining sifatini oshirish;
• OAV eʼtiborini Oʻzbekistonda “aqlli” shahar va qishloqlarni rivojlantirish bilan bogʻliq dolzarb masalalarga jalb etish;
• Arxitektura va muhandislik yoʻnalishlari boʻyicha taʼlimni yoshlar orasida ommalashtirish;
• Yashil qurilish, barqaror arxitektura va “aqlli” shaharni rejalashtirish sohasini ilgari surish.

• Oʻzbekiston Respublikasida istiqomat qiluvchi arxitektura, muhandislik va shaharsozlik yoʻnalishlari talabalari va bitiruvchilari qatnashishi mumkin;
• Taklif qilinadigan loyihalari 2018-yil 1-yanvardan 2023-yil 30-iyulgacha ishlab chiqilgan boʻlishi kerak;
• 35 yoshdan oshmagan mustaqil faoliyat olib boruvchi mutaxassislar ham ishtirok etishlari mumkin.

Loyihalarga qoʻyilgan talablar:

• Tanlov ishi amaliy yoʻnaltirilgan loyiha boʻlishi, uni amalga oshirish uchun mumkin boʻlgan resurs taʼminoti, amalga oshirishning aniq mexanizmlari, erishilgan samarani nazorat qilish tavsifi aks ettirilishi kerak;
• Oʻzbekiston Respublikasini ijtimoiy-iqtisodiy rivojlantirishga qaratilgan loyiha boʻlishi;
• Tanlov ishida muallifning shaxsiy tadqiqoti natijalarining mavjudligi;
• Past uglerodli, suv tejamkor qurilish materiallari va texnologiyalaridan foydalanishni nazarda tutuvchi innovatsion va ilgʻor yechimlardan foydalanganligi;
• Loyihaning yangiligi va ijtimoiy ahamiyati;
• Loyihani amalga oshirish imkoniyati;
• Loyiha mualliflik huquqiga rioya qilingan holda ishlab chiqilishi kerak.

Eslatma: Tanlov materiallarida reklama maʼlumotlari, shuningdek, Oʻzbekiston hududida tarqatilishi taqiqlangan yoki cheklangan maʼlumotlar boʻlmasligi kerak. Ushbu maʼlumotlarga ega arizalar koʻrib chiqilmaydi.

• Har bir nominatsiya boʻyicha gʻoliblar grafik dizayn bilan ishlash uchun noutbuklar bilan taqdirlanadi;
• Yosh arxitektorlar uchun oʻz salohiyatini namoyon etish va tajriba orttirish imkoniyati;
• Oʻzbekistonda “aqlli” shahar va qishloqlarni rivojlantirishga oʻz hissasini qoʻshish.

Dasturda ishtirok etishni istaganlar ushbu havola orqali ariza topshirishlari mumkin.

Talab qilinadigan hujjatlar:

• shaxsni tasdiqlovchi hujjat nusxasi (PDF yoki JPEG formatda maksimal 10 MB);
• talaba guvohnomasi/oliy taʼlim muassasasi diplomi/oʻqiyotganlik toʻgʻrisidagi maʼlumotnoma (PDF yoki JPEG formatidagi 5 ta fayldan koʻp boʻlmagan, maksimal 10 MB);
• Loyiha haqida maʼlumot (Word formatda maksimal 10 MB);
• Oʻzbekiston Respublikasi hududini qamrab oluvchi loyihalar (PDF formatda yuklanishi, fayllar soni 5 tadan oshmasligi va fayl hajmi maksimal 10 MB boʻlishi kerak).

Muhim: Taklif etiladigan ishlar Google shaklida yuklash uchun sizda Google akkaunti (gmail.com elektron pochta manzili) boʻlishi kerak.

• Tanlov 2023-yil 1-iyundan 30-sentyabrgacha oʻtkaziladi;
• Qoʻshimcha maʼlumot uchun Telegram manziliga murojaat qilish mumkin;
• Oxirgi muddat: 30-iyul, 2023-yil (18:00).