Yosh tadqiqotchilar uchun Germaniyada 1 yil grant asosida oʻqish imkonini beruvchi xarajatlari qoplanadigan dastur

The Study Foundation of the House of Representatives (Vakillik palatasi oʻquv fondi) bu AQSh, Buyuk Britaniya, Fransiya va sobiq Sovet Ittifoqi davlatlaridan boʻlgan yosh tadqiqotchilar uchun moʻljallangan dastur hisoblanib, dasturda Germaniya, Germaniyaning xalqaro masalalari yoki Berlinga oid tadqiqot olib borayotganlar ishtirok etishlari mumkin. Shuningdek, ishtirokchilar Berlindagi dastur davomida Germaniyaning siyosiy, ijtimoiy tizimi bilan tanishishlari hamda Berlin vakillik palatasi bilan davomiy munosabatlarni yoʻlga qoʻyishlari mumkin boʻladi.

Dastur gʻoliblari Berlin universitetida 1 yillik oʻqish uchun grantni qoʻlga kiritishadi. Dastur davomida turar-joy xarajatlari grant maʼmuriyati tomonidan qoplanadi hamda ishtirokchilar har oy stipendiya bilan taʼminlanadi. Dastur yakunlanganidan keyin esa ishtirokchilar oʻz davlatlariga qaytib ketishlari kerak boʻladi. Grantga arizalarni qabul qilish jarayoni 2023-yil 15-dekabrgacha davom etadi.

Dastur haqida toʻliq maʼlumotni ushbu havola orqali nemis tilida dasturning rasmiy sahifasidan topish mumkin.

Dastur haqida ingliz tilidagi batafsil maʼlumotlarni ushbu havola orqali topish mumkin.

Dasturda ishtirok etish uchun quyidagi talablar mavjud:

• Grantda AQSh, Buyuk Britaniya, Fransiya va sobiq Sovet ittifoqi davlatlaridan boʻlgan yosh tadqiqotchilar ishtirok etishlari mumkin;
• Dastur eng kamida bakalavr bosqichi yoki bakalavrga teng darajani tamomlagan barcha sohadagi yosh universitet bitiruvchilari yoki yosh tadqiqotchilar uchun moʻljallangan;
• Dastur ishtirokchilari Germaniya, Germaniyaning xalqaro masalalari yoki Berlinga oid tadqiqot olib borayotganlar boʻlishlari lozim;
• Ishtirokchilarning akademik koʻrsatkichlari yuqori boʻlishi lozim;
• Dasturga 35 yoshgacha boʻlgan ishtirokchilar ariza topshirishlari mumkin. Shuningdek, ular 25 yoshgacha bakalavr darajasini tugatgan va diplomlarini olgan boʻlishlari zarur;
• Universitetni tugatgandan keyin uzoq vaqt davomida ish faoliyatini olib bormagan nomzodlar dasturda qatnasha olmaydilar;
• Ariza topshirish jarayonida nomzodlardan oʻzlarining tadqiqot obyektlarini batafsil yoritib berishlari soʻraladi. Bundan tashqari, ular Berlin tadqiqot universitetining professor yoki oʻqituvchisi tomonidan universitetga taklif xatini ariza shakli bilan birga joylashi ham talab qilinadi. Taklif xatini doktorantura bosqichida tahsil olayotgan talabalar taqdim etishlari majburiy emas, ammo tavsiya qilinadi;
• Grantni yutgandan keyin nomzodlar boshqa grantlar uchun ariza topshira olmaydilar.

Dastur talablari haqida ushbu havola orqali batafsil maʼlumot olish mumkin.

Dasturning quyidagi foydali jihatlari mavjud:

• Dastur ishtirokchilariga har oy maʼlum darajada stipendiya beriladi. Stipendiya miqdori taʼlim talabaning darajasiga qarab farq qiladi;
• Magistratura va doktorantura talabalariga har oy 1100 yevrodan stipendiya ajratiladi;
• Doktorantura bosqichidan keyingi tadqiqotchilar uchun har oy 1630 yevrodan taqdim etiladi;
• Oylik stipendiya Berlin universitetida turar-joy xarajatlari (330 yevro)ni ham oʻz ichiga oladi. Boshqa turdagi turar-joy xarajatlari qoplab berilmaydi;
• Berlinga kelib-ketish xarajatlari toʻliq qoplanadi. Buning uchun Yevropa hududidan keluvchilarga 200 yevro, Yevropadan boshqa hududdan keluvchilarga esa 600 yevro mablagʻ ajratiladi;
• Maʼlum bir holatlarda qoʻshimcha moliyaviy yordam ham koʻrsatilishi mumkin;
• Ammo sogʻliq muammolari, halokatlar yoki kasal boʻlganda davolanish uchun ketadigan xarajatlar nomzodlarning oʻzlari tomonidan qoplanishi kerak.

Eslatma! Dastur bir akademik yil davom etadi. Grant yakunlaganidan soʻng har bir ishtirokchi oʻz davlatiga qaytib ketishga majburdir.

Dasturning foydali tomonlari haqida ushbu havola orqali toʻliq maʼlumot olish mumkin.

Dasturga ariza topshirish uchun alohida havola mavjud emas. Ariza topshirish uchun ishtirokchilar Study Foundation of the Berlin House of Representatives dasturiga ariza shaklini soʻrab murojaat qilish lozim. Dastur maʼmuriyati ariza shaklini joʻnatganidan soʻng, nomzod uni toʻldirib Study Foundationga joʻnatiladi. Grantga ariza topshirish jarayoni 15-dekabrgacha davom etadi. Bir yil davom etadigan grant 1-oktyabrdan boshlanib, 31-iyulgacha davom etadi. Dastur davomida stipendiyani uzluksiz ravishda olish va bekor qilinmasligi uchun ishtirokchilar akademik va tadqiqot faoliyatlarini yaxshi olib borishlari hamda grant tomonidan tashkillashtirilgan uchrashuvlarda toʻliq ishtirok etishlari zarur.

Dasturga ariza topshirish jarayonida quyidagi hujjatlar kerak boʻladi:

• CV (birinchi betida yaqinda tushilgan rasm ham boʻlishi kerak);
• Loyiha boʻyicha maʼlumot- nomzodning oʻquv rejasi, tadqiqoti yoki loyihasining batafsil tushuntirilgan xati. Agarda nomzodning bundan oldingi bajargan loyihalari ham ushbu ishga bogʻliq boʻlsa, ular haqida ham maʼlumot berish mumkin;
• Motivatsion xat- motivatsion xatda nomzodlar kelajakda jamiyatga qanday foyda keltirishni niyat qilganlari va grantda qatnashishlari bunga qanchalik darajada foydali boʻlishi haqida yozishlari kerak boʻladi;
• 2 ta tavsiyanoma- nomzodning oʻz sohasidagi professor yoki olimlar tomonidan uning akademik darajasi hamda imkoniyatlari haqida yozilgan boʻlishi kerak;
• Diplom transkripti;
• Universitet diplomi (Yakuniy baholar ham joʻnatilishi kerak).

Eslatma! Transkript taqdim etilganda undagi baholash tizimi haqida ham maʼlumot berilgan boʻlishi kerak. Barcha hujjatlar ingliz yoki nemis tiliga tarjima qilingan boʻlishi zarur. Barcha soʻralgan hujjatlar toʻliq topshirilishi lozim. Aks holda, ariza koʻrib chiqilmaydi.

Dasturning saralash bosqichida quyidagilar inobatga olinadi:

• Akademik yutuqlar, imtihon natijalari, nomzodning mutaxassislik sohasi;
• Nomzod loyihasi yoki tadqiqot obyektining sifatida hamda ishonchliligi;
• Oʻz sohasi boʻyicha professor yoki mutaxassislar yozib bergan tavsiyanoma;
• Berlin universiteti oʻqituvchisi yoki olimi tomonidan yozilgan oʻqish taklifi xati;
• Ijtimoiy va siyosiy faolligi;
• Nemis tilini bilish darajasi.

Dasturga ariza topshirish jarayoni haqida ushbu havola orqali batafsil ma'lumot olish mumkin.

Maʼlumot uchun:
E-mail: studienstiftung@parlament-berlin.de;
Tel.: (+4930) 2325 2005;
Fax: (+4930) 2325 2008;

Manzil: Studienstiftung des Abgeordnetenhauses von Berlin
Regina Rahm
Niederkirchnerstr. 5
D-10117 Berlin.

Dastur haqida quyidagi ijtimoiy tarmoqlar orqali ham maʼlumot olish mumkin:

-Twitter;

-YouTube;

-Instagram;

-Soundcloud;

-Telegram.