Yoshlar ishlari agentligidan barcha talabalar uchun “WikiOromgoh"

2024-yil 4-9-mart kunlari “WikiTaʼlim” loyihasi doirasida yana bir WikiOromgoh tashkillashtirilmoqda. Unda Oʻzbekistondagi barcha oliygohlardan faol yoshlar bir yerga jamlanib, bir necha kun davomida oʻzbekcha Vikipediyada sahifa yaratish, maqola joylash hamda ularni tahrirlash saboqlarini olishadi. Shuningdek, olgan bilimlarini oʻzlarining oliygohlaridagi boshqa talablarga oʻrgatishadi.

Оromgohda talabalar madaniy hordiq chiqarib, turli dasturlar orqali oʻzlarining iqtidorlarini namoyish etishlari mumkin. Oromgoh xarajatlari toʻliq Yoshlar ishlari agentligi tomonidan qoplab beriladi.

Mazkur dasturda Oʻzbekistondagi barcha oliy taʼlim muassasalaridan faqat bir nafardan faol talaba jalb qilinadi.

Dasturda qatnashish uchun quyidagi talablar mavjud:

• Oʻzbekiston Respublikasi oliygohlarida tahsil olayotgan barcha faol talabalar oromgohda ishtirok etish huquqiga ega;
• Oromgohda ishtirok etishni istovchilar Vikipediya haqida ma’lumotga ega bo‘lishi va universitet yoki institutidagi ijtimoiy hayotda faol boʻlishi talab etiladi.

Dasturda qatnashish talablari bilan batafsil ushbu havola orqali tanishish mumkin.

Dasturning quyidagi foydali jihatlari mavjud:

• Oromgohda talabalar madaniy hordiq chiqarib, turli dasturlar orqali o‘zlarining iqtidorlarini namoyish etishlari mumkin;
• Saralashdan oʻtgan ishtirokchilarning barcha xarajatlari tashkilot tomonidan qoplab beriladi (Viloyatdan keladigan ishtirokchilarning Toshkent shahriga kelish va qaytish xarajatlari bundan mustasno).

Oromgohni oʻtkazish bilan bogʻliq sarf-xarajatlar quyidagi manbalar hisobidan:

– Davlat budjeti mablagʻlari;

– Qonun hujjatlarida taqiqlanmagan boshqa manbalar hisobidan

moliyalashtiriladi.

• Mazkur dasturda qatnashish uchun nomzodlar o'z oliygohi rahbariyatiga murojaat qilishi kerak;
• Oromgohga borishi uchun talabalar orasidan aynan kimning nomzod sifatida ko‘rsatilishi Loyiha tashkilotchilarining tavsiyasi bo‘yicha, faol tahrirchi bo‘lmagan taqdirda oliygoh rahbariyati ixtiyoriga ko‘ra amalga oshiriladi.

Oromgohni tashkil etish va uni oʻtkazish vazifasi Yoshlar ishlari agentligi zimmasiga yuklatiladi.

Yoshlar ishlari agentligi:

– Oromgohni oʻtkazish borasida qaror qabul qiladi;

– Oromgohning asosiy bosqichlari va tartib-qoidalari haqida ishtirokchilarni xabardor qiladi;

– Barcha ishtirokchilar uchun teng sharoitlarni yaratadi;

– Oromgohni oʻtkazish borasida oshkoralikni taʼminlaydi;

– Muddatidan oldin Oromgohga saralash natijalari haqida maʼlumotlar tarqalishining oldini olish choralarini koʻradi;

– Oromgoh ishtirokchilari oʻrtasida yuzaga keladigan nizolarni hal etadi;

– Mazkur Nizomga asoslangan holda Oromgohning oʻtkazilishini tashkil etadi.

Oromgohning maqsad va vazifalari

1. Mazkur Oromgoh Vikipediya onlayn ensiklopediyasida oʻzbek tilidagi maqolalar sonini oshirish maqsadida tashkil etiladi.

2.Oromgohni tashkil etish orqali quyidagi vazifalar bajarilishi koʻzda tutiladi:

– Vikipediya onlayn ensiklopediyasida oʻzbek tilidagi maqolalar sonini oshirish;

– Jamiyatimizdagi aktual mavzularni Vikipediyada muntazam yoritib borish;

– Vikipediyada sifatli maqola yaratuvchi volontyorlar sonini oshirish;

– Vikipediyada maqola yaratuvchi foydalanuvchilarning tajribasini oshirish.

Dastur haqida ushbu havola orqali telegram kanalidan ham batafsil maʼlumot olish mumkin.