AQShda toʻliq moliyalashtirilgan holda 10 oy malaka oshirish imkonini beruvchi Humphrey fellowship dasturi

Humphrey stipendiya dasturi  - The Humphrey Fellowship Program - Fulbright almashinuv dasturlaridan biri boʻlib, oʻzbekistonlik mutaxassislarga AQShda 10 oy davomida diplomsiz magistratura bosqichida tahsil olish va oʻz mutaxassisliklari boʻyicha tegishli amaliy tajribaga ega boʻlish imkonini beradi.

Dasturga davlat va jamoat tashkilotlari yoki xususiy sektorda ishlayotgan, boshqaruv qobiliyatiga ega faol, tashabbuskor mutaxassislarga tanlov asosida qabul qilinadi.

Dastur ishtirokchilari Amerika universitetlaridan birida taxminan bir yil davomida o'zlarining kasbiy qiziqishlariga mos keladigan magistratura darajasidagi kurslarda qatnashadilar. Biroq Humphrey Fellowship Program dasturi diplom beradigan dastur emasligi sababli ishtirokchilar o'z vaqtlarining katta qismini kasbiy rivojlanish faoliyatiga bag'ishlaydilar, jumladan, AQSh professor-o'qituvchilari va ekspertlaridan maslahat olishadi va hamkorlik aloqarini tashkillash, ekskursiyalar, seminarlar, tadqiqot loyihalarida ishtirok etish va o'z vatanida qo'llashi mumkin bo'lgan amaliy dasturlarni ishlab chiqish imkoniyatiga ega bo'lishadi. 

Dastur doirasida o'qish mumkin bo'lgan yo'nalishlar: 

1. Aloqa va jurnalistika;

2. Huquq va boshqaruv;

3. Tabiiy resurslar siyosati;

4. Davlat va iqtisodiy siyosat;

5. Sog'liqni saqlash siyosati va boshqaruvi;

6. Texnologiya siyosati va boshqaruvi.

Ayni paytda 2026-2027-yil mavsumi uchun arizalar qabul qilinmoqda. 
Oxirgi muddat: 2026-yil 3-iyul.

Dastur ishtirokchilarining barcha xarajatlari to'liq moliyalashtiriladi.

Grant haqidagi maʼlumotlar bilan GrantGO tomonidan tayyorlangan quyidagi video/ovozli chat orqali ham tanishish mumkin:

Dasturda ishtirok etish uchun talablar:

• Bakalavr taʼlimini tugatgan, bakalavr diplomi yoki bakalavr darajasiga ega boʻlishi kerak;

• Kamida 5 yillik toʻliq ish tajribasiga ega boʻlishi lozim;

• Yetakchilik qobiliyatiga ega bo'lishi va jamoaviy ishlarda faol bo'lishi kerak;

• Ingliz tilini yaxshi bilishi lozim. Til sertifikati talab qilinadi: IELTS 6, TOEFL 72, DUOLINGO

• Universitetni yaqinda tamomlaganlar, garchi yuqori lavozimda ishlayotgan bo'lsa ham, dasturda ishtirok eta olmaydi;

• Menejment salohiyatiga ega bo'lmagan akademik tadqiqotchilar yoki universitet professorlari (giyohvand moddalarni iste'mol qilish, oldini olish va davolashga qaratilgan ta'lim, shu bilan birga,  ingliz tilini ikkinchi til sifatida o'qitish sohasida faoliyat olib borayotgan mutaxassislardan tashqari) ariza topshirish imkoniyatiga ega emas;

• Avvalgi yetti yil davomida bir yoki undan koʻproq oʻquv yili davomida Qoʻshma Shtatlardagi magitraturada oʻqiganlar ham dasturda qatnasha olmaydi;

• AQShda so'nggi 5 yil davomida 6 oydan ko'p muddatda istiqomat qilganlar ishtiroki qo'llab-quvvatlanmaydi;

• AQSh fuqaroligi yoki AQShda doimiy rezidentlik maqomiga ega bo'lgan shaxslar dasturga ariza topshira olmaydi.

Bundan tashqari ariza topshiruvchilardan quyidagilar kutiladi:

1. Yetakchilik salohiyati va oʻz jamoasiga manfaat koʻrsatish istagi;

2. Kasbiy rivojlanish uchun qobiliyat hamda oʻz ixtisoslashgan sohalarining siyosiy koʻrinishlariga qiziqishi;

3. darsdan tashqari mashgʻulotlarida va jamoat ishlarida faol boʻlish;

4. Intellektuallik, tashabbuskorlik va AQSH tashkilotlari va mutaxassislari bilan aloqa oʻrnatish qobiliyati;

5. Dasturda ishtirok etish uchun oʻzini koʻrsata olishi;

6. Ariza topshiruvchilar dastur asosida olingan tajribalarini oʻz mamlakatlari va tashkilotlarida ham qoʻllash imkoniyati;

7. AQSHda oʻqish uchun ingliz tilini yetarlicha bilishi;

8. Humphrey dasturini targʻib qilish va oʻz yurtiga qaytish istagi.

Dasturga qabul qilinganlarning quyidagi xarajatlari moliyalashtiriladi:

• Ekonom-klass toifasidagi ikki tarafga uchish aviachiptasi;

• AQShda yashash xarajatlari;

• J-1 vizasini olishga yordam (Viza almashinuvi dasturi);

• Tibbiy sugʻurta;

• Ta'lim oladigan tegishli universitetidagi barcha xarajatlari;

• Dastur doirasidagi barcha qisqa safar va konferensiya, mashg'ulotlar xarajatlari;

• AQShda oʻqish boshlanishidan oldingi tanishtiruv dasturida ishtirok etish imkoniyatiga ham ega bo'ladilar.

Eslatma: Dastur ariza topshiruvchining unga hamroh boʻlgan oila aʼzolarining xarajatlarini qoplamaydi

Dasturga arizalar onlayn qabul qilinadi. 

Topshirish uchun quyidagi hujjatlar talab qilinadi:

• Bakalavr diplomi va bakalavr davridagi o’tilgan fanlar va baholarni o’z ichiga olgan transkript;

• Magistratura/PhD diplomi (agar mavjud bo’lsa). Bunda faqat diplomning o’zini topshirish so’raladi, transkript shart emas.

• Ingliz tilini bilish darajasini aniqlovchi shakl bo’sh qoldirilishi kerak. TOEFL/IELTS sertifikat bo’lishi talab etilmaydi, ammo bo’lsa TashkentFulbright@state.gov emailiga yuborilishi lozim;

• Tavsiyanoma xati 2 ta.

Eslatma: Tavsiyanomalardan biri hozirgi ish beruvchingizdan boʻlishi lozim. Tavsiyanomalar tavsiya etuvchilar tomonidan onlayn tizimda topshiriladi. Agar onlayn topshirish imkoni boʻlmasa, tavsiya etuvchilar tavsiyanoma shaklini yuklab olib, uni toʻldirib TashkentFulbright@state.gov elektron manziliga yuborishlari soʻraladi. Fulbright idorasi tavsiyanomalarni qabul qilgach, tavsiyanoma bergan shaxslarga javob xati joʻnatadi. Tavsiyanomalar ingliz tilida boʻlishi kerak.

• Humphrey stipendiya dasturi juda raqobatbardosh boʻlib, ariza topshiruvchilar yuqorida koʻrsatilgan talablarga toʻla javob berishlari kerak;

• Ariza topshirish muddati tugagandan soʻng, barcha yuborilgan onlayn arizalar texnik koʻrikdan oʻtkaziladi;

• Texnik koʻrikdan oʻtgan arizalar elchixona rasmiylari va sobiq grant yutganlardan tashkil topgan tanlov komissiyasi tomonidan koʻrib chiqiladi;

• Ular har bir arizani standart mezonlarga asoslanib baholaydi.

• Soʻngra eng yuqori ball toʻplagan ariza topshiruvchilar AQSh elchixonasida boʻlib oʻtadigan suhbatga taklif qilinadi;

• Yuqori ball toʻplagan ariza topshiruvchilar AQSH elchixonasi taqdim etgan vaucherlardan foydalanishi uchun TOEFL ga roʻyxatdan oʻtishlari talab qilinadi;

• Tanlangan nomzodlarning ismlari yakuniy tasdiqlash uchun Vashington shtatidagi J.William Fulbright nomidagi chet el stipendiyalari kengashiga yuboriladi.

Qo'shimcha murojaatlar uchun: TashkentFulbright@state.gov