“El-yurt umidi” jamgʻarmasi tomonidan bakalavr, magistratura va doktorantura bosqichini Fransiyada oʻqish uchun 50 ta grant!

Fransiya elchixonasi, Campus France va “El-yurt umidi” jamgʻarmasi oʻrtasidagi qoʻshma grantlarni moliyalashtirish uchun 50 oʻringa moʻljallangan ochiq stipendiya tanlovlarini eʼlon qiladi. Dasturda mamlakatimizning innovatsion salohiyatini yanada rivojlantirishni maqsad qilgan, kreativ fikrlaydigan yoshlar, isteʼdodli professor-oʻqituvchilar, yosh olimlar va ilmiy tadqiqotchilar, pedagoglar va barcha qiziquvchilar ishtirok etishlari mumkin.

“El-yurt umidi” jamgʻarmasi tomonidan 2022-2023-oʻquv yili uchun ushbu grantlar quyidagi tartibda taqsimlanadi:

• bakalavriat taʼlim dasturi uchun 10 nafar;
• magistratura taʼlim dasturi uchun 30 nafar;
• doktorantura taʼlim dasturi uchun 10 nafar stipendiyalar ajratishini maʼlum qiladi.

“El-yurt umidi” jamgʻarmasi Oʻzbekiston Respublikasi uchun eng ustuvor sohalar boʻyicha Fransiyaning nufuzli oliygohlarida taʼlim olish imkoniyatini taqdim etadi, jumladan:

• Neft va gaz, elektr energiyasi, qayta tiklanadigan energiya, geologiya va konchilik;
• Yadro muhandisligi, elektrotexnika, aerokosmik muhandislik va fuqaro aviatsiyasi;
• Аvtomobilsozlik;
• Аxborot texnologiyalari va sunʼiy intellekt;
• Suv va ekologiya muhandisligi, agronomiya;
• Gumanitar fanlar, chet tillari;
• Madaniyat, turizm va sport, kinematografiya, madaniy meros va muzeyshunoslik, moda;
• Аrxitektura va dizayn;
• Iqtisodiyot va menejment, huquq, jurnalistika, davlat boshqaruvi;
• Sogʻliqni saqlash va farmatsevtika.

Dasturga qabul qilingan ishtirokchilarning barcha xarajatlari toʻliq tashkilot tomonidan moliyalashtiriladi.

Tanlovlarda quyidagi shaxslar ishtirok etishi mumkin:

• Xorijda bakalavriat, magistratura va doktorantura dasturlari boʼyicha taʼlim olishda faqat Oʼzbekiston Respublikasi fuqarolari qatnasha oladi.

Doktorantura dasturlari boʻyicha:

• 22-45 yosh oraligʻida boʻlgan;
• Ilgari xorijda PhD yoki fan doktori ilmiy darajasiga ega boʻlmaslik;
• Tanlagan mutaxassisligi boʻyicha kamida ikki yil mehnat tajribasiga ega boʻlganlar (oliy ta’lim muassasasi tavsiya etadigan nomzodlar bundan mustasno).

Magistratura dasturlari boʻyicha:

• 20-40 yosh oraligʻida boʻlgan;
• Ilgari oʻxshash mutaxassislik boʻyicha xorijda magistratura dasturlarida tahsil olmagan bo'lishi;
• Tanlagan mutaxassisligi boʻyicha kamida ikki yil mehnat tajribasiga ega boʻlganlar (oliy ta’lim muassasasi tavsiya etadigan nomzodlar bundan mustasno).

Bakalavriat dasturlari boʻyicha:

• 25 yoshgacha boʻlgan;
• Ilgari oʻxshash mutaxassislik boʻyicha xorijda bakalavriat dasturlarida tahsil olmagan bo'lishi.

Dastur talablari haqida batafsil rasmiy kanalda e'lon qilingan xabarlar yoki ushbu havola orqali ma'lumot olish mumkin.

“El-yurt umidi” jamg'armasi  dasturiga ko'ra ishtirokchilarning quyidagi xarajatlari qoplab beriladi:

• Bakalavr, magistratura yoki doktoranturada oʻqishi qiymati toʻlovi toʻliq qoplanadi;
• Shuningdek, vizalar olish, stipendiatlarning barcha turdagi transport vositalari bilan taʼlim olish joyigacha boʻlgan yoʻlkira xarajatlari (ikkala tomonga, koʻpi bilan yiliga bir marta);
• Taʼlim olish davrida yashash, ovqatlanish, tibbiy sugʻurta va transport xarajatlari;
• Zarur oʻquv va ilmiy adabiyotlarni xarid qilish, shu jumladan darsliklar sotib olish, stipendiat taʼlim olayotgan xorijiy taʼlim, ilmiy yoki boshqa muassasa talablariga binoan ilmiy maqolalar chop ettirish, ilmiy maqolalarni koʻchirib (elektron tarzda yuklab) olish, maqolalar hamda ilmiy adabiyotlarning elektron bazasiga obuna boʻlish;
• Jamgʻarma Vasiylik kengashi qaroriga koʻra stipendiatlarning xorijda taʼlim olishi bilan bevosita bogʻliq boshqa xarajatlari;
• Har bir taʼlim dasturi boʻyicha bitta stipendiatga ajratiladigan xarajatlarning cheklangan miqdori Jamgʻarmaning Vasiylik kengashi tomonidan belgilanadi.

Dastur manfaatli jihatlari bilan batafsil ushbu havola orqali tanishish mumkin.

Tanlovda ishtirok etish uchun arizalar “El-yurt umidi” jamgʼarmasining onlayn platformasi orqali elektron shaklda topshiriladi. Hujjatlar 2022 yilning 15 martdan – 15 mayga qadar davom etadi.

Onlayn hujjat topshirish platformasidagi barcha kerakli maʼlumotlar ushbu havolada berilgan. 

• Barcha nomzodlar uchun (birinchi darajali hujjatlar) haqida batafsil ma'lumot ushbu havolada berilgan;
• Bakalavr talabalari uchun kerakli hujjatlar haqida batafsil ma'lumot ushbu havolada berilgan;
• Magistratura uchun kerakli hujjatlar haqida batafsil ushbu havola orqali ma'lumot olish mumkin;
• Doktorontura uchun kerakli hujjatlar haqida batafsil ushbu havola orqali ma'lumot olish mumkin;

Qo'shimcha murojaatlar @Elyurt_bot  rasmiy boti oraqali qabul qilinadi. 

Dasturga hujjat topshirish haqida batafsil ushbu havola orqali bilib olish mumkin.

Nomzodlarni saralash ikki bosqichda amalga oshiriladi:

1-bosqich hujjatlarni ushbu Nizomda belgilangan talablar asosida qabul qilish, tahlil qilish va roʼyxatga olishni koʼzda tutadi.

2-bosqichda nomzodlar bilan xorijda taʼlim olishdan koʼzlangan maqsad va taʼlim olish tugagach olingan bilimlarni Oʼzbekistonda qoʼllash imkoniyatlari, tanlagan mutaxassisligi boʼyicha bilim va koʼnikmalari darajasini aniqlashga qaratilgan davlat tilida suhbat oʼtkazilishi koʼzda tutiladi.

Jamgʼarmaning Vasiylik kengashi nomzodlarning intellektual, tahlil qilish va ijodiy qobiliyatlari darajasini aniqlashga qaratilgan qoʼshimcha test sinovi oʼtkazish boʼyicha qaror qabul qilish huquqiga ega.

Jamgʼarma Vasiylik kengashining Jamgʼarma taʼlim dasturlari boʼyicha oʼtkazilgan saralash tanlovi natijalarini tasdiqlash haqidagi qarori tanlov oʼtkazilgandan soʼng bir oy muddat ichida eʼlon qilinadi.

Ochiq saralash tanlovidan muvaffaqiyatli oʼtgan nomzodlarga Vasiylik kengashi tomonidan belgilangan shakldagi sertifikatlar topshiriladi.

Xorijiy tаʼlim muаssаsаlаri qаndаy tаnlаnаdi?

Xorijda taʼlim olish uchun taʼlim muassasalari qoida tariqasida, THE (The Times Higher Education World University Rankings), QS (Quacquarelli Symonds World University Rankings), The U. S. News and World Report (Best Global University Rankings) va ARWU (Academic Ranking of World Universities) kabi xalqaro miqyosda eʼtirof etilgan akademik reytingning eng ilgʼor 300 ta (yoki tanlab olingan fan boʼyicha yetakchi 100 ta) taʼlim va ilmiy muassasalar roʼyxatidan joy olgan xorijiy taʼlim, ilmiy hamda boshqa muassasalar ichidan tanlab olinadi.

Qo'shimcha murojaatlar @Elyurt_bot  rasmiy boti oraqali qabul qilinadi.