Germaniyada musiqa yoʻnalishi boʻyicha magistraturada taʼlim olish uchun xarajatlari toʻliq qoplanuvchi DAAD stipendiyasi dasturi

DAAD stipendiyalari bakalavr bitiruvchilariga magistratura yoki davomiy taʼlim kursini Germaniyada oʻqish imkoniyatini beradi. Shuningdek, ushbu dastur hamkasblar oʻrtasida tajriba almashish va aloqa oʻrnatishga yordam beradi.

Dasturda ikki xil yoʻl bilan taʼlim olish mumkin:

• Yakuniy kasbiy malaka bera oluvchi magistratura/aspirantura darajasi;
• Yakuniy kasbiy malaka bermaydigan qoʻshimcha kurs (bakalavriat kursi emas).

Oʻquv dasturi 2 bosqichli (odatda toʻrt semestrlik magistratura) yoki ikki semestrda oʻtkaziladigan 3 bosqichli (konsert imtihoni, master-klass yoki badiiy fan boʻyicha PhD)dan iborat boʻlishi mumkin.

Darslar tanlangan universitet talabiga qarab ingliz yoki nemis tillarida boʻlib oʻtadi. Til bilish sertifikati talab etiladi.

Dastur nomzodlarning oʻqish toʻlovlari, yashash hamda sugʻurta xarajatlari va boshqa shu qator toʻlovlarni qoplaydi. Oylik stipendiya ham beriladi.

Dastur haqida batafsil ushbu havola orqali tanishish mumkin.

Dasturda ishtirok etish uchun nomzodlardan quyidagilar soʻraladi:

• Nomzod musiqa sohasida bakalavr darajasiga ega boʻlishi yoki dastur boshlangunicha bakalavr bosqichini tugatishi kerak;
• Bakalavr darajasini tugatganiga 6 yildan oshmagan boʻlish kerak;
• Agar ishtirokchi bakalavr darajasiga ega boʻlmasa, oʻz mamlakatida oʻzi tanlagan cholgʻu asbobi boʻyicha mavjud boʻlgan barcha treninglarda qatnashgan boʻlishi lozim;
• Yosh chegarasi nomzod oʻzi tanlagan universitet/kollej tomonidan yoki nomzodning ilmiy darajasi hamda tanlagan fanlariga qarab belgilanishi mumkin;
• Ariza berish uchun soʻngi muddat tugagunga qadar Germaniya hududida 15 oydan koʻp istiqomat qilgan nomzodlarning arizasi qabul qilinmaydi;
• Stipendiya magistraturada oʻqish, konsert imtihoniga tayyorgarlik koʻrish va mahorat darslarida qatnashish uchun ajratiladi;
• Agar nomzod chet elda magistratura yoki aspirantura bosqichini oʻtayotgan boʻlsa, ushbu davr uchun quyidagi holatdagina stipendiya berilishi mumkin:

- Oʻquv tashrifi stipendiya olish uchun muhim boʻlsa va ushbu tashrif oʻz mamlakatlari ichida boʻlmagan holatda;

- Mazkur sayohat stipendiya muddatining chorak qismidan oshmasligi zarur. Ushbu muddatdan uzoq tashriflar hatto qisman ham qoplanmaydi.

• Musiqa sohasidagi nomzodlar oʻzlari tanlagan universitet/kollej talablarida soʻralgan taʼlim tilini bilishlari zarur. Ariza muddati tugagunga qadar talab qilingan tilni bilmagan qatnashchilar, oʻz arizalarida mazkur til boʻyicha qanchalik koʻnikmaga ega ekanliklarini koʻrsatishlari lozim;
• Agar nomzodning tanlagan universiteti/kolleji tomonidan taʼlim tili sifatida nemis tili talab etilsa, mazkur tilni oʻrganish majburiy hisoblanadi;
• Ushbu dastur faqat badiiy sohadagi loyihalarni moliyalashtiradi. Musiqashunoslik yoki musiqa taʼlimi yoʻnalishidagi nomzodlar yoki ilmiy loyihaga ega musiqachilar uchun boshqa DAAD stipendiya dasturlar mavjud;
• Stipendiya tanlangan oʻquv dasturiga qarab 10 oydan 24 oygacha beriladi. Agar tanlangan kurs 2 yillik boʻlsa, ikkinchi yil uchun stipendiya nomzodning birinchi yildagi oʻzlashtirish darajasiga qarab beriladi;
• Ariza topshirish vaqtida Germaniyada oʻqishning birinchi yilida boʻlgan nomzodlar ikkinchi oʻqish yilini moliyalashtirish uchun ariza topshirishlari mumkin;
• Stipendiya muddatini maksimal 24 oydan ortiqroq muddatga uzaytirish faqat oʻqishning yangi bosqichiga oʻtish nazarda tutilgan taqdirdagina mumkin boʻladi (odatda, imtihon konserti yoki master-klass kabi dasturlar uchun). Malakali nomzodlar konsert imtihonini 24 oygacha uzaytirish uchun ariza berishlari mumkin.
• Oʻquv yili keyingi yilning 1-oktyabridan boshlanadi. Agar til oʻrganish kursi oldinroq boshlansa, oʻquv yili ushbu muddatdan oldin boshlanishi ham mumkin. Pandemiya sababli til kurslari masofadan turib oʻtkazilishi ham mumkin.

Dastur maqbullik shartlari haqida batafsil ushbu havola orqali tanishish mumkin.

Dasturga qabul qilingan nomzodlar quyidagi imtiyozlarga ega boʻladi:

• Ishtirokchilarga oylik 934 yevro miqdorida stipendiya beriladi;
• Sayohat va sugʻurta (salomatlik, baxtsiz hodisalar va shaxsiy javobgarlik) xarajatlari qoplanadi;
• Oʻqish uchun bir martalik toʻlov miqdori beriladi;
• Ijara toʻlovlari qoplanadi;
• Nomzodning oila aʼzolaridan biror kim qatnashchiga hamrohlik qilgan taqdirda ushbu shaxs uchun ham yordam puli ajratiladi;
• Nogironligi yoki surunkali kasalligi mavjud boʻlgan nomzodlarga davolanish uchun mablagʻ beriladi. Bu haqida batafsil ushbu havola orqali tanishish mumkin;
• Stipendiyaga tasdiqlangan soʻng, nemis tilini oʻrganish uchun onlayn til kursi toʻlovlari qoplanadi;
• Stipendiyaga tasdiqlanganlik haqida xabarni olgandan keyin yoki moliyalash muddati tugagunga qadar Germaniyada oʻtkazilgan TestDaF yoki DSH testi uchun toʻlovlar qoplanadi.

Dastur manfaatli jihatlari haqida batafsil ushbu havola orqali tanishish mumkin.

Dasturga ariza topshirish 2 bosqichda amalga oshiriladi:

• Ariza topshirish;
• Ish namunalarini yuklash.

Dasturga ariza topshirish DAAD portali orqali onlayn ravishda amalga oshiriladi.

Sertifikatlar, kreditlarni tasdiqlovchi hujjatlar va tarjimalar tasdiqlanmagan shaklda skanerlanishi va DAAD portaliga yuklanishi mumkin. DAAD hujjatlarning tasdiqlangan nusxalarini talab qilish huquqini oʻzida saqlab qoladi.

Quyidagi hujjatlar DAAD portaliga yuklanishi lozim:

• Onlayn ariza shakli;
• Jadval koʻrinishidagi toʻliq oʻquv rejasi;
• Germaniyada rejalashtirilgan oʻquv loyihasining akademik va shaxsiy sabablari haqida bayonot (motivatsiya xati; 1 — 3 bet). Ariza beruvchilar uchun muhim maʼlumotni ushbu havola orqali olish mumkin;
• Baholar tarjimasi;
• Milliy tilda taqdim etilgan hujjatlarning nemis yoki ingliz tilidagi tarjimalari;
• Oxirgi tugatgan universitet darajasi diplomi. Agar nomzodning oʻqishi hali tugamagan boʻlsa, ushbu diplom dastur boshlanishidan oldin topshirilishi ham mumkin;
• Diplomli dasturlar uchun agar mavjud boʻlsa, qabul qiluvchi universitetdan qabul xati. Ariza topshirish vaqtida qabul xati boʻlmagan nomzodlar universitetga oʻz vaqtida murojaat qilishlari va keyinchalik oʻquv dasturi boshlanishidan oldin tasdiqlash xatini topshirishlari kerak;
• Diplomsiz dastur turi uchun nemis universiteti oʻqituvchisidan nazoratni tasdiqlash zarur;
• Taʼlim tilini bilishni tasdiqlovchi hujjat (nemis yoki ingliz). Til sertifikati olingan sanaga 2 yildan oshmagan boʻlishi lozim.
• Dasturga ariza berish tugagunga qadar pandemiya tufayli til sertifikatiga ega boʻla olmagan nomzodlar CEFR boʻyicha oʻzini oʻzi baholash tasdiqnomasini topshirishlari mumkin. Til koʻnikmasi boʻyicha oʻzini oʻzi baholash haqida maslahatlarni ushbu havola orqali topish mumkin.
• Bunday hollarda, til sertifikatining yoʻqligi DAAD tomonidan stipendiya arizasining rasmiy ravishda rad etilishiga olib kelmaydi. Ammo ushbu sertifikat baholash uchun kiritilgan va tanlangan universitetga oʻqishga qabul qilinish uchun ham talab etiladi. Shuning uchun til sertifikati keyinroq olingan taqdirda ham dasturga topshirilishi lozim;
• Yozib olinadigan ishlarning umumiy koʻrinishi (Audio/video fayllar haqida maʼlumot) bilan ushbu havola orqali tanishish mumkin. Ish namunalarini DAAD portaliga yuklash mumkin emas.

Ish namunalarini joylash quyidagicha amalga oshiriladi:

• Nomzodlar ariza topshirgandan soʻng 2 hafta oʻtgach, ularga oʻz ish namunalarini DAAD media database hududiga joylash uchun havola beriladi. Havola berilgandan soʻng 2 hafta ichida oʻz ish namunalarini joylashlari lozim;
• Ushbu namunalar audio shaklda boʻlsa, mp3, wav formatlariga; video shaklida boʻlsa mp4 formatiga mos kelishi kerak.

Dasturga ariza topshirish uchun umumiy koʻrsatmalar:

• DAAD portalida roʻyxatdan oʻtish lozim. Roʻyxatdan oʻtish uchun koʻrsatmalar bilan ushbu havola orqali tanishish mumkin;
• DAAD portalida onlayn ariza berish kerak va ariza berish koʻrsatmalari bilan ushbu havola orqali tanishish mumkin.
• Onlayn ariza shaklini yuklab olish va toʻldirish;
• Ariza hujjatlarini tayyorlash;
• Nemis yoki ingliz tilida boʻlmagan hujjatlarni tarjima qilish;
• Qogʻoz hujjatlarni skanerlash va PDF formatida saqlash (Portalga faqat PDF fayllarni yuklash mumkin)
• Toʻldirilgan anketani va kerakli ilovalarni (ish namunalaridan tashqari) PDF formatida portalga yuklash lozim;
• Tarjimalar, agar kerak boʻlsa, asl tilda chiqarilgan hujjat bilan birga yuklanishi kerak.

Eslatmalar:

• Mezbon universitetga qabul qilish uchun belgilangan sanaga qadar ariza topshirish va DAADning stipendiya mukofoti haqidagi xabar faqat tanlangan mezbon universitetga qabul qilingan taqdirdagina kuchga kiradi;
• Grantni qoʻlga kiritish arizada koʻrsatilgan musiqa universiteti/kollejlaridan biriga avtomatik ravishda kirishni kafolatlamaydi. Tegishli musiqa kolleji stipendiya egalariga joy taklif qilish yoki bermaslik toʻgʻrisida qaror qabul qiladi. Aksariyat hollarda abituriyentlar kirish imtihonini topshirishlari shart. Nomzodlardan oʻzlari tanlagan universitetga kirish talablari, ariza topshirish muddatlari va suhbat sanalari bilan tanishib chiqishlari soʻraladi. Kirish imtihonlari DAAD stipendiyasidan oldin boʻlishi ham mumkin va bunday holatda ushbu dastur kirish imtihoni toʻlovlarini qoplab bermaydi. Agar ariza beruvchiga DAAD tomonidan stipendiya taklif qilinsa, lekin universitetga qabul qilinmasa, u berilgan stipendiyadan foydalana olmaydi;
• Barcha kerakli hujjatlarni oʻz ichiga olmagan arizalar koʻrib chiqilmaydi;
  DAAD portali oxirgi ariza kunida soat 00:00 (CET yoki CEST)da yopiladi. Kechiktirilgan yoki toʻliq boʻlmagan arizalar qabul qilinmaydi;
  Ariza hujjatlari DAADda qoladi. Nomzodlarning shaxsiy maʼlumotlari Federal qonunga va Yevropa Ittifoqining maʼlumotlarni himoya qilish toʻgʻrisidagi nizomiga muvofiq saqlanadi, chunki bu maʼlumotlar arizani qayta ishlash uchun zarur boʻladi.

Dasturga arizalarni ushbu havola orqali ro'yxatdan o'tib topshirish mumkin. 
 

• Arizaning sifati arizaning asosliligi, loyihaning maqsadga muvofiqligi, chet elda boʻlishga tayyorgarlik holati, qolishning badiiy martaba bilan bogʻliqligi, shuningdek, professional istiqbollar bilan bogʻliqligini oʻz ichiga oladi.
• Germaniya musiqa kollejlari professorlaridan tashkil topgan maxsus DAAD qoʻmitasi musiqa sohasidagi stipendiyalar boʻyicha yakuniy qarorni qabul qiladi. Qaror yozma arizalar va taqdim etilishi kerak boʻlgan ovozli yozuvlarga asoslanadi.
• Oʻqishga qabul 2024-yilning 1-iyulidan mazkur yilning 29-sentyabriga qadar davom etadi.

Nomzodlar 2025-yil fevral oyida saralab olinadi va ularni moliyalashtirish 2025-yilning oktyabr oyidan boshlanadi.

Murojaat uchun:

Axborot va maslahat markazlari

Mintaqaviy idora Qohira

Germaniya akademik almashinuv xizmati

Al-Saleh Ayoub koʻchasi, 11

Qohira-Zamalek

Misr

Telefon: +20 2/27 35 27 26

Faks: +20 2/27 38 41 36

Elektron pochta: info@daadcairo.org

WWW: http://www.daad.eg

Janob Mohamed Fathy

Elektron pochta: mohamed.fathy@daadcairo.org

Hujjatlar bilan bogʻliq muammolar uchun manzil:

Har ish kuni soat 9.00dan 12.00gacha va 14.00dan 16.00gacha (CET) +49 (0228) 882-8888 yoki portal@daad.de elektron pochtasi orqali savollarni qoldirish mumkin.

Batafsil maʼlumot:

DAAD veb-sayti “Grantga daʼvogarlar uchun muhim maʼlumotlar” boʻlimi

DAAD veb-sayti “Oʻquv dasturlari va til kurslari” boʻlimi

DAAD veb-saytining Germaniyada qolishni rejalashtirish uchun “Oʻqishni rejalashtirish” boʻlimi

Kampaniya veb-sayti