Talabalar va malakali mutaxassislar uchun Yaponiyada haq toʻlanadigan amaliyot dasturi — METI Japan Internship Program 2026

Yaponiya hukumatining Iqtisodiyot, savdo va sanoat vazirligi (METI) tomonidan ilgʻor malakaga ega mutaxassis va talabalar uchun haq toʻlanadigan METI Japan Internship Program 2026 amaliyot dasturi taqdim etiladi. Dastur doirasida Yaponiyadagi jami 80 ta kompaniyaga amaliyotchilar qabul qilinishi rejalashtirilgan.

Dasturdan asosiy maqsad yapon kompaniyalarining globallashuvini ragʻbatlantirish, kompaniyalarning xorijdagi biznesini kengaytirish va amaliyot dasturi orqali xorijdagi universitetlar bilan hamkorlikni yoʻlga qoʻyishdir.

Ishtirokchilar 2 xil usulda amaliyot oʻtashlari mumkin:

• Shaxsan amaliyot oʻtash. Bunda amaliyotchilar Yaponiyadagi asosiy biznes joylari boʻlgan kichik va oʻrta kompaniyalarda faoliyat olib borishadi (sanoat assotsiatsiyalari, notijorat tashkilotlari va mahalliy hukumatlar bundan mustasno).
• Onlayn amaliyot oʻtash. Bunda mezbon kompaniya faoliyatining rahbarligi va boshqaruvi ostida amaliyotchi tomonidan masofadan turib amalga oshiriladi.

Dastur haqida batafsil ushbu havola orqali maʼlumot olish mumkin.

• Dasturda 18 yoshdan 40 yoshgacha boʻlgan talabalar, bitiruvchilar, ilgʻor malakaga ega mutaxassislar ishtirok etishi mumkin;
• Nomzod rivojlanayotgan mamlakat fuqarosi boʻlishi shart (Oʻzbekiston roʻyxatda bor);
• Yapon tili (JLPT darajasi N3 yoki undan yuqori) yoki ingliz tilini bilish talab qilinadi;
• Har bitta kompaniyaga faqat 1 ta amaliyotchi qabul qilinadi (maksimal 100 ta kompaniya);
• Nomzodlar dasturning maqsadi toʻliq amalga oshishi uchun tashkilotchilar bilan oʻzaro hamkorlik qilishi kerak;
• Ishtirokchi oʻzini oʻrganish va amaliyotga bagʻishlay olishi, shuningdek. dastur idorasi (JIP ofisi) tomonidan belgilangan jadvalga muvofiq holda amaliyot oʻtash imkoniyati boʻlishi shart;
• Talabgor har bir kompaniya tomonidan talab qilinadigan boshqa maxsus shartlarga mos kelishi kerak.

Amaliyotchilar quyidagi vazifalarni bajarishi kerak:

• Amaliyot rejasini ishlab chiqish;
• Dasturga oid barcha treninglar va yakuniy taqdimotda ishtirok etish;
• Dastur idorasi va mezbon kompaniya bilan muntazam aloqa qilish, hisobot berish va maslahatlashish;
• Amaliyotdan oldin, davomida va undan keyin kerak boʻladigan turli hujjat, bildirishnoma, hisobot va boshqalarni topshirish;
• Iloji boricha yapon tili kurslarida qatnashish (amaliyot oʻtkazuvchi kompaniya doimiy ish oʻrni taklif qilishini hisobga olgan holda);
• Yaponiya hukumati tomonidan moliyalashtiriladigan loyiha ishtirokchisi sifatida munosib xulq-atvorni koʻrsatish.

Eslatma: Yoshga qoʻyilgan talab 2026-yil 25-avgust holatiga koʻra hisoblanadi. 2016-2025-yillarda ushbu dasturda ishtirok etganlar qayta ariza topshirishi mumkin emas.

• Yaponiyada amaliyot oʻtayotganlar uchun kunlik 3,000 yen (~$21), onlayn amaliyotchilar uchun 1,000 yen (~$7) miqdorida haq toʻlanadi;
• Borish-kelish aviachiptalari (ekonom klassda), turarjoy va amaliyot sugʻurtasi bilan taʼminlanadi;
• Viza olishda yordam beriladi;
• Amaliyot uchun kerak boʻlganda shaxsiy kompyuter va boshqa jihozlar taqdim etiladi;
• Dasturga oid treninglar oʻtkaziladi;
• Ishtirokchilar Yaponiyaga shaxsan borib yoki onlayn amaliyot oʻtashlari mumkin.

Muhim: Dastur ishga joylashish uchun platforma hisoblanmaydi. Biroq avvallari mezbon kompaniyalar tomonidan qobiliyatli va uddaburon amaliyotchilarni ishga yollash holatlari kuzatilgan.

Dasturda qatnashishni istaganlar ushbu havola orqali ariza topshirishlari mumkin.

Talab qilinadigan hujjatlar:

• Universitet yoki boshqa oʻquv yurtiga oʻqishga kirganligi toʻgʻrisidagi guvohnoma (talabalar uchun);
• Universitet yoki universitet fakultetidan tavsiyanoma (talabalar uchun);
• Universitetni tamomlaganligi toʻgʻrisidagi guvohnoma va universitet fakulteti yoki muassasasining tavsiyanomasi (bitiruvchilar uchun);
• Til bilish sertifikatlari (IELTS, TOEIC, TOEFL, CEFR, JLPT va boshqalar).

Eslatma: Ariza beruvchilarga amaliyot dasturining ikkala turiga ham hujjat topshirish imkoniyati beriladi. Amaliyot turiga qarab talab qilinadigan hujjatlarda oʻzgarish boʻlishi mumkin.

• Yakuniy natijalar avgust oyining oxirigacha eʼlon qilinadi;
• Takroran soʻraladigan savollarga javob bu yerda.

Amaliyot quyidagi jarayonlarni oʻz ichiga oladi:

1. Ishga qabul qilish:
   1. Ishga qabul qilish boʻyicha maʼlumot beruvchi axborot sessiyalari oʻtkaziladi (qatnashish majburiy emas);
   2. Ariza topshirish. Bunda nomzodning amaliyotchi sifatida qobiliyati/tajribasi, loyiha maqsadlarini tushunishi, kompaniyaga oid istaklari va amaliyot tafsilotlari tekshiriladi;
   3. Saralash. Keltirilgan maʼlumot va hujjatlarga asosan kompaniya eng mos deb topilgan nomzodlarni saralaydi;
   4. Natijalar haqida xabar beriladi;
   5. Saralanganlar bilan shartnoma tuziladi.
2. Qabul qilish va tartiblarni belgilash:
   1. Amaliyot rejasini taqdim etish;
   2. Amaliyotni boshlashdan oldingi tayyorgarlik. Bunda mezbon kompaniya amaliyotchini qulay ish muhiti bilan taʼminlash uchun stol-stul, shaxsiy kompyuter va internet kabi barcha zarur jihozlar bilan taʼminlaydi;
   3. Amaliyotdan oldindan mashgʻulot. Bunda madaniyatlararo tushunishni taʼminlash va amaliyotni oʻtash boʻyicha qoʻshimcha koʻrsatmalar berish uchun seminar oʻtkaziladi.
3. Amaliyotni amalga oshirish:
   1. Amaliyot. Muvaffaqiyatli amaliyotni taʼminlash uchun ish joyidagi qoidalar va ehtiyot choralari aniq tushuntirilgandan soʻng amaliyot boshlanadi;
   2. Suhbat. Bunda amaliyotchi va kompaniya oʻrtasida taxminan 30 minut davom etadigan suhbat oʻtkaziladi. Unda amaliyotning turli jihatlari, jumladan, qoniqish, taassurotlar, natijalar va har qanday duch kelgan qiyinchiliklar boʻyicha suhbat oʻtkaziladi hamda muammolar kerakli tartibda hal etiladi.
   3. Taqdimotni yakunlash. Amaliyot oxirida natijalar taqdimoti onlayn tarzda oʻtkaziladi. Bunda kompaniya menejeri/supervayzeri va amaliyotchi erishgan natijalari va kompaniyaning missiyasi qanchalik amalga oshirilgani haqida taqdimot qiladi.
   4. Amaliyot yakuni. Bunda har amaliyotchi oʻz hisobotini taqdim etadi.
   5. Saralash jarayoni. Amaliyot davomida yoki undan keyin amaliyotchi mezbon kompaniyada ishga joylashish boʻyicha saralashdan oʻtadi.
   6. Yapon tili kursi. Agar kompaniyada doimiy ish oʻrnini taklif qilsa, yapon tilini oʻrgatuvchi maxsus kurslarga qatnashish kerak.