Rivojlanayotgan davlatlar fuqarolari uchun magistratura va PhD bosqichini Germaniyada to'liq moliyalashtirilgan holda o'qish imkonini beruvchi DAAD stipendiyasi

DAADning navbatdagi “Development-Related Postgraduate Courses” (EPOS) stipendiyasi 2022-2023-yillarda magistratura va PhD bosqichini Germaniyada oʻqish istagida boʻlgan talabalar talabalar uchun moʻljallangan.

Rivojlanayotgan davlatlarning fuqarosi hisoblangan, ingliz yoki nemis tilidan xabardor, sohasiga doir kamida 2 yillik ish tajribasiga ega, jamiyat rivoji uchun faol va munosib hissa qoʻshib kelayotgan barcha umidli nomzodlar irqi, jinsi, salomatlik darajasidan (sogʻlom yoki imkoniyati cheklanganlik) qatʼi nazar, stipendiya uchun ariza berishi mumkin. Nomzodlar Germaniyada joylashgan va DAAD tomonidan taklif etilayotgan yoʻnalishlar: Tibbiyot, muhandislik, aniq fanlar, tabiiy fanlar, biznes, huquqshunoslik, qishloq xoʻjaligi, oʻqitish va b. boʻyicha tegishli universitetlarga ariza topshirishlari lozim. DAAD tomonidan eng munosib deb topilgan talabgorlar dastur doirasida stipendiya imtiyozlaridan foydalanish (oylik stipendiya, bepul safar hamda sugʻurta) imkoniyatiga ega boʻladilar.

Dasturning davomiylik muddati magistratura bosqichi uchun 12-24 oy, PhD uchun 42 oyni tashkil etadi. Dastur davomiyligi tanlangan universitetning oʻquv muddatiga bogʻliq.

Oʻquv muddati davomida talabalar, eng asosiysi, sohani rivojlantirishga doir eng ilgʻor bilim va tajribalar bilan tanishadilar, dunyo boʻylab yangi doʻstlar orttiradilar va Germaniya madaniyati bilan yaqindan tanishadilar. Bu, albatta, kelajakda ularning kasbiy va shaxsiy rivojlanishlarida beqiyos rol oʻynaydi.

• Davlat, jamoat yoki xususiy tashkilotlarda ijtimoiy, iqtisodiy, texnologik sohalarga aloqador boʻlgan siyosiy rivojlanishga urgʻu bergan loyihalar va yoʻnalishlarni rejalashtirish va amalga oshirishda kamida 2 yildan beri ishtirok etib/ishlab kelayotgan boʻlishi.
• Oʻrtacha 4 yillik oʻquv davrini qamrab olgan bakalavr diplomiga ega boʻlishi.
• Oʻqishni aʼlo baholarga tugatgan boʻlishi va bakalavr darajasidan keyin kamida 2 yil oʻz sohasiga aloqador ish tajribasiga ega boʻlishi.
• Oʻqishni bitirganligiga 6 yildan oshmagan boʻlishi kerak.
• Dastur 6 oylik nemis tili tayyorlov kursini ham qamrab olgani bois, nemis tilini kamida B1 darajada bilish

Muhim: ariza topshirish muddatida 15 oydan koʻp Germaniya hududida boʻlganlarning arizasi qabul qilinmaydi.

• Akademik baholari va qayd etgan natijalariga qarab, magistratura talabalariga €861, PhD talablariga €1.200 oylik stipendiya taqdim etiladi.
• Sogʻliq, baxtsiz hodisa va shaxsiy ehtiyojlar bilan bogʻliq sugʻurta puli qoplanadi.
• Sayohat xarajatlari uchun moliyaviy yordam koʻrsatiladi (mezbon davlat yoki biror tashkilot taʼminotni boʻyniga olguncha).
• Yuqoridagilarga qoʻshimcha tarzda, agar nomzod oylik ijara toʻlasa yoki oila aʼzolari hamrohlik qilsa, unga oylik qoʻshimcha mablagʻ ajratiladi.

Barcha hujjat topshirish mumkin bo'lgan yo'nalishlar va ularning oxirgi muddatlari bilan ushbu havolada tanishish mumkin. 

Kerakli hujjatlar:

• Shaxsiy imzo bilan tasdiqlangan ariza hujjati.
• Shaxsiy imzo bilan tasdiqlangan CV (europass namunasidan foydalanish tavsiya qilinadi).
• Shaxsan imzolangan motivatsiya xati (nima uchun aynan oʻsha kurs tanlanganligi va hozirgi ishi/kasbi haqida; maksimal hajm: 2 bet).
• Ish rahbarining tavsiyanoma xati (imzo, muhr va hozirgi sana bilan).
• Kamida 2 yildan beri (bakalavr bosqichidan keyin) ishlayotgani haqida ish joyidan maxsus sertifikat va (imkon qadar) dastur tugagandan keyin qayta ishga olinishi haqida kafolat xati.
• Ingliz tilini bilish darajasini tasdiqlovchi hujjat (IELTS — min. 6.5; TOEFL).
• Nemis tilini bilish darajasini tasdiqlovchi hujjat (nemis tilida oʻqitiladigan kurslarga tegishli; min. B1 daraja).
• Bakalavr yoki magistrlik diplomining nusxasi (ingliz tilidagi tarjimasi bilan).
• Oʻqitilgan fanlar va baholarni qamrab olgan hujjatdan nusxa (ingliz tilidagi tarjimasi bilan).

Eslatma:

• Yuqoridagilardan tashqari, tanlangan yoʻnalishga muvofiq qoʻshimcha hujjatlar talab qilinishi mumkin. Qoʻshimcha talablar bilan batafsil bu yerda tanishing.
• Hujjatlar toʻgʻridan toʻgʻri tanlanayotgan kurs uchun ajratilgan universitet veb-saytiga yuborilishi lozim. DAAD tashkilotiga yuborilgan hujjatlar universitetlarga joʻnatilmaydi.
• Nomzodlar 3 tagacha kurs tanlash huquqiga ega. Kurslar ketma-ketligi muhimlik darajasiga qarab tartiblanishi lozim.
• Agar uchta kurs tanlansa, buning sababi va muhimlik darajasiga qarab saralashda nimalarga ahamiyat berilganligi motivatsion xatda aks etishi lozim, Aks holda, nomzod stipendiyani qoʻlga kiritgan taqdirda ham, undan mahrum qilinadi.

Ariza topshirishning oxirgi muddati va oʻquv binosining manzili tanlangan kursga (universitetga) bo gʻliq.

Hujjatlarni saralash quyidagi tartibda amalga oshiriladi:

1. Ariza toʻgʻridan toʻgʻri tanlangan universitet saytiga joylanadi.
2. Qabul komissiyasi hujjatlarni saralab, mos keluvchi nomzodlarni DAAD tashkilotiga tavsiya qiladi.
3. DAAD tavsiya etilgan nomzodlar bilan aloqaga chiqib, qoʻshimcha hujjatlarni topshirishni soʻraydi.
4. Yakuniy saralash nihoyasiga yetib, soʻnggi xulosalar bilan nomzodlar tanishtiriladi.

Muhim: joylangan barcha hujjatlarning qoʻshimcha nusxasi saqlab qoʻyilgani maʼqul. Sababi, nomzod DAAD stipendiyasiga loyiq koʻrilganda, ana oʻsha hujjatlarni yana bir bor joylashi soʻralishi mumkin.

Qoʻshimcha maʼlumotlarni maxsus yoʻriqnomadan va saytda keltirilgan savol-javob boʻlimidan olish mumkin.