Yaponiyada bakalavriat bosqichini toʻliq moliyalashtirilgan holda oʻqish uchun MEXT Scholarship granti

Hujjat topshirish

Dasturda qatnashishni istaganlar kerakli hujjatlarni 2024-yil 24-may soat 18:00gacha Yaponiyaning Oʻzbekistondagi elchixonasiga topshirishi kerak.

Talab qilinadigan hujjatlar (ingliz yoki yapon tilida):

• Application form — 1 ta asl 1 ta koʻchirma nusxa;
• Placement Preference Form (faqat asl nusxasi). Bu hujjatni faqatgina universitetga toʻgʻridan-toʻgʻri qabul qilinayotgan talabalar topshirishi kerak;
• Maktab/litsey/kollejdagi akademik transkriptlar. Agar universitetda oʻqiyotgan yoki universitetni bitirgan boʻlsa, universitetdagi akademik transkriptlar ham qoʻshib topshiriladi. Akademik transkriptlar taʼlim muassasasi tomonidan muhrlangan boʻlishi hamda 1 ta asl va 1 ta koʻchirma nusxasi taqdim etilishi zarur.
• Shahodatnoma yoki litsey/kollej diplomi. Nomzod universitetni bitirgan boʻlsa, universitet diplomi ham taqdim etishi kerak. Shahodatnoma yoki diplomlarning faqatgina koʻchirma nusxasi (2 tadan) topshiriladi. Biroq bu koʻchirma nusxa taʼlim muassasasi tomonidan rasmiy muhr bilan tasdiqlangan boʻlishi lozim.

Muhim: Agar nomzod hali maktab/litsey/kollejni yoki universitetni bitirmagan boʻlsa (oxirgi sinf yoki kurs talabalari), shahodatnoma va/yoki diplom oʻrniga taʼlim muassasasi tomonidan shu yili tugatishini tasdiqlovchi maʼlumotnoma taqdim etishi kerak.

• Tavsiyanoma (1 ta asl va1 ta koʻchirma nusxasi) Tavsiyanoma oxirgi oʻqish joyidagi sinf/guruh rahbari yoki oxirgi oʻquv muassasasi direktori tomonidan berilishi kerak;
• Tibbiy maʼlumotnoma (1 ta asl va 1 ta koʻchirma nusxasi) 2025-yil uchun belgilangan namunada ingliz tilida toʻldirilib, doktor imzosi va shifoxonaning (poliklinika) muhri bilan topshirilishi lozim;

Eslatma: Har qanday shifoxona (poliklinika) yoki xususiy tibbiyot markaziga murojaat qilish mumkin.

• OTMda oʻqiyotganlik haqida maʼlumotnoma (1 ta asl va 1 ta koʻchirma nusxasi). Bu hujjatni faqatgina OTMda tahsil olayotganlar topshiradi;
• Kirish imtihonlarini topshirib, universitetga qabul qilinganlik haqidagi maʼlumotnoma (1 ta asl va 1 ta koʻchirma nusxasi). Bu hujjatni faqatgina biror universitetga kirish uchun kirish imtihonini topshirib, qabul qilingan, biroq hali oʻqishni boshlamagan talabalar topshiradi;
• Til bilish sertifikatlari (agar boʻlsa):
  • IELTS;
  • TOEFL;
  • JLPT va boshqalar.

Muhim: Asl va koʻchirma nusxalar alohida toʻplam koʻrinishida, stepler qilmasdan topshirilishi shart.

Dastur uchun qabul quyidagi bosqichlardan iborat:

1-bosqichda talab qilingan hujjatlarni 2024-yil 24-may soat 18:00 dan kechiktirmasdan topshirish kerak. Birinchi bosqichning yakuniy natijalari 2024-yil 10-iyunda eʼlon qilinadi va natijalar haqida maʼlumotni toʻgʻridan-toʻgʻri elchixonaga qoʻngʻiroq qilib bilib olish mumkin.

2-bosqichga oʻtganlardan 2024-yil 22-23-iyun kunlari yozma imtihon olinadi.

Imtihon olinadigan fanlar yoʻnalishga qarab farqlanadi:

• Ijtimoiy-gumanitar fanlar yoʻnalishi uchun:
  • Ingliz tili;
  • Matematika;
  • Yapon tili.
• Tabiiy fanlar yoʻnalishi uchun:
  • Ingliz tili;
  • Matematika;
  • Kimyo;
  • Yapon tili;
  • Fizika yoki biologiya (yoʻnalishga qarab).

3-bosqichda saralangan nomzodlar bilan Oʻzbekistonda iyul oyida suhbat oʻtkaziladi. Suhbat oʻtkaziladigan aniq sana keyinchalik eʼlon qilinadi.

4-bosqich 2025-yil yanvar-fevral oylarida oʻtkaziladi va MEXT tomonidan natijalarga qarab saralanadi. Grantni yutgan nomzodlardan universitetning kirish imtihonini topshirishi soʻralishi mumkin.

Avvalgi yillardagi imtihonlarda tushgan savollar bilan ushbu havola orqali maʼlumot olish mumkin.

Grantning asosiy shartlari va hujjat topshirish qoidalari bilan ushbu havola orqali toʻliq tanishib chiqish va kerakli hujjatlarni ushbu havola orqali yuklab olish mumkin.