Yevropaning nufuzli universitetlarida magistratura bosqichini oʻqish uchun barcha xarajatlari toʻliq moliyalashtiriluvchi Erasmus Mundus Joint Master Degree DENSYS dasturi
-
06/10/2024 Qabul boshlanishi
-
Toʻliq Moliyalash turi
-
Yevropa Davlat
-
27/01/2025 16:00 Oxirgi muddat
Umumiy maʻlumotlar
Erasmus Mundus Joint Master Degree DENSYS Program Yevropaning nufuzli universitetlarida Decentralised smart Energy Systems (Qayta ishlasa boʻladigan energiya tizimi) sohasi boʻyicha magistratura bosqichida oʻqishni istovchi talabalar uchun tashkil etilgan dastur hisoblanadi.
Yevropa Ittifoqining Erasmus+ dasturi tomonidan moliyalashtirilgan Erasmus Mundus Joint Master Degree DENSYS dasturiga qabul qilingan talabalar 2025-2027 yil davоmida Université de Lorraine (Fransiya), Royal Institute of Technology (Shvetsiya), Politecnico di Torino (Italiya), Universitat Politècnica de Catalunya (Ispaniya) oliygohlarida oʻqish imkoniyatiga ega boʻladi.
Dasturda koʻzlangan maqsad mexanika, elektr muhandisligi va energetika kabi sohalarda yetarli tajriba va bilimga ega boʻlgan talabalar bilimini yanada takomillashtirish, shu orqali energiya tizimlarini optimallashtirish va uning samaradorligini oshirishdan iborat. Qolaversa, talabalar energiya tizimlari haqida batafsil maʼlumotga ega boʻladi. Hududlarda mavjud energiya bilan bogʻliq muammolar bilan tanishadi va ularga xalqaro tajribaga ega mutaxassislar bilan birga yechim topadilar.
Dastur yakunida ishtirokchi talabalar 2 xil diplomga ega boʻladi:
- Fransiyaning Université de Lorraine oliygohining “Decentralised Smart Energy System” yoʻnalishida magistrlik darajasi;
- Mutaxassisligi boʻyicha 3-semestr uchun tanlagan universitet diplomi:
- Master of Science (Shvetsiya);
- MSc in Energy and Nuclear Engineering (Italiya);
- Erasmus Mundus Master in Decentralised Smart Energy Systems, with Thermal Energy Engineering Specialization (Ispaniya).
2024-yilda DENSYS dasturida dunyo boʻylab 11 ta davlatdan 450 dan ortiq talabalar ishtirok etishdi. Bu haqida batafsil ushbu havola orqali maʼlumot olish mumkin.
Bu yilgi dasturda Oʻzbekiston hududidagi talabalarga alohida eʼtibor qaratilmoqda va bu grant yutish imkoniyatini oshirishga xizmat qiladi. Dastur davomidagi safar xarajatlari qoplanadi va yashash xarajatlari uchun oylik stipendiya beriladi.
Grant haqidagi maʼlumotlar bilan GrantGO tomonidan tayyorlangan quyidagi video/ovozli chat orqali ham tanishish mumkin:
Maqbullik shartlari
Dasturda ishtirok etish uchun nomzodlar quyidagi talablarga javob berishi lozim:
- Barcha davlat fuqarolari ariza topshirishi mumkin;
- Muhandislik, texnika va energetika kabi sohalari boʻyicha bakalavr darajasiga ega boʻlishi lozim:
- Ingliz tilini yaxshi bilish kerak. Kamida IELTS 6.5 va TOEFL 92 talab etiladi;
- Yuqori akademik koʻrsatkichga ega boʻlishi kerak;
- Dasturda qatnashish uchun katta qiziqishga ega boʻlishi va buni ariza topshirish jarayonida namoyon eta olishi kerak.
Dastur talablari haqida batafsil ushbu havola orqali maʼlumot olish mumkin.
Foydali tomonlari
Dasturga qabul qilingan ishtirokchilar quyidagi imtiyozlarga ega boʻladi:
- Yevropaning nufuzli universitetlaridan birida bepul oʻqish imkoniyatiga ega boʻladi;
- Ishtirokchilar yashash xarajatlari uchun oyiga €1400 (~$1541) stipendiya bilan taʼminlanadi;
- Safar xarajatlari uchun masofaga qarab yiliga €3000, kelib joylashib olish uchun qoʻshimcha €1000 gacha moliyaviy yordam beriladi;
- Tibbiy sugʻurta xarajatlari qoplanadi.
Dasturning manfaatli jihatlari haqida batafsil ushbu havola orqali maʼlumot olish mumkin.
Qoʻshimcha maʻlumotlar
Baholanish mezoni:
Ishtirokchilar ariza topshirish jarayonida taqdim etgan hujjatlariga asosan 100 ballik tizimda baholanadilar:
- Bakalavr darajasi va olgan baholari uchun — maksimum 45;
- Tavsiyanomalar va video uchun — maksimum 20;
- Motivatsiya xati, ish tajribasi va akademik yutuqlari uchun — maksimum 25;
- Til bilish darajasi uchun — maksimum 10.
Talabalar mart oyining boshida elektron pochta orqali arizalari haqida xabardor qilinadi. Saralangan talabalar ishtirokini tasdiqlashlari kerak. Keyin asosiy roʻyxat va zaxira roʻyxati tasdiqlash uchun Yevropa Ittifoqiga yuboriladi. Yakuniy natijalar (Yevropa Ittifoqi maʼqullaganidan keyin) iyun eʼlon qilinadi.
Dastur tarkibiy qismlari haqida batafsil ushbu havola orqali maʼlumot olish mumkin.
Qoʻshimcha murojaatlar ushbu havola orqali qabul qilinadi.